ភ្នំពេញៈ នគរបាលប៉ុស្តិ៍ទួលសង្កែ បានធ្វើការឃាត់ខ្លួនមុខសញ្ញាសកម្មខាងកាច់សោ កម៉ូតូរបស់ប្រជាពលរដ្ឋម្នាក់ និងបាមដកហូតសម្ភារៈមួយចំនួន។ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង ១០និង៣០នាទីព្រឹក ថ្ងៃទី១២ ខែមិថុនា ឆ្នាំ២០១៧ ដែលស្ថិតនៅចំណុចផ្ទះជួលគ្មានលេខ ផ្លូវលំ ក្រុមទី៦ ភូមិទួលគោក សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ។

លោក នង សាបុង នាយប៉ុស្តិ៍ស្តីទី បានឲ្យដឹងថា ជនសង្ស័យដែលឃាត់ខ្លួននោះមានឈ្មោះ ប៊ុន លីសាក ភេទប្រុស អាយុ ៣២ឆ្នាំ មុខរបរ មិនពិតប្រាកដ មានទីលំនៅផ្ទះគ្មានលេខ ភូមិបាក់ទូក សង្កាត់ទួលសង្កែ១ ខណ្ឌឫស្សីកែវ។ ចំណែកឯជនរងគ្រោះមានឈ្មោះ នាក់ មុន្នីរតនៈ ភេទប្រុស អាយុ១៩ឆ្នាំ មុខរបរ នៅផ្ទះ មានទីលំនៅកន្លែងកើតហេតុខាងលើ។

លោក នង សាបុង បានបន្តទៀតថា មុនពេលកើតហេតុ ជនរងគ្រោះបានជិះម៉ូតូ មួយគ្រឿង ម៉ាក ហុងដាឌ្រីសង់ ស៊េរី២០០៩ បិតតែមឡើងស៊េរី២០១៤ ពាក់ស្លាកលេខ ភ្នំពេញ 1AG-8082 ត្រឡប់ពីផ្សារសាំហាន់ទិញម្ហូបយកទៅផ្ទះវិញ។ ពេលនោះ ជនរងគ្រោះបានទុកម៉ូតូនៅខាងក្រោយផ្ទះជួល ដោយមានចាក់សោកម៉ូតូត្រឹមត្រូវ ហើយជនរងគ្រោះបានឡើងទៅលើផ្ទះជួលជាន់២។

លុះដល់វេលាម៉ោង ១០និង៣០នាទីព្រឹក ថ្ងៃខែឆ្នាំដដែរ ស្រាប់តែបងប្រុសរបស់ជនរងគ្រោះបានចេញមកមុខបន្ទប់ជួលឈរនិយាយទូរសព្ទ ក៏ឃើញជនសង្ស័យខាងលើ កំពុងតែបណ្តើរម៉ូតូប្អូនរបស់ខ្លួន ភ្លាមៗនោះ បងប្រុសរបស់ជនរងគ្រោះបានស្រែកផ្អើលឆោឡោ ក៏បានជួបជាមួយកម្លាំងល្បាតប៉ុស្តិ៍ ក៏ធ្វើការដេញតាមជនសង្ស័យខាងលើ និងឃាត់ខ្លួនបានតែម្តង។

ក្រោយពីឃាត់ខ្លួនជនសង្ស័យខាងលើរួចមក សមត្ថកិច្ចយើងបានធ្វើការដកហូតសោរប្រដាប់កាច់កម៉ូតូចំនួន ១ដើម សោរឆ្កឹះ មួយដើម និងទុលវីស មួយដើម។ ក្រោយមក សមត្ថកិច្ចយើងបាននាំទៅធ្វើការសាកសួរនៅប៉ុស្តិ៍នគរបាលរដ្ឋបាលទួលសង្កែ។ ចំណែកឯម៉ូតូជនរងគ្រោះ ត្រូវបានសមត្ថកិច្ចប្រគល់ជូនឲ្យម្ចាស់ដើមវិញ។

បច្ចុប្បន្នជនសង្ស័យខាងលើ រួមនឹងវត្ថុតាង ត្រូវសមត្ថកិច្ចបញ្ជូនខ្លួនទៅឃុំជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការបន្តតាមនីតិវិធីច្បាប់៕