តាកែវៈ លោកឧត្តមសេនីយ៍ត្រី ឡា ឡៃ មេបញ្ជាការអាវុធហត្ថខេត្តតាកែវ បានប្រាប់Post News មុននេះបន្តិចថា កងរាជអាវុធហត្ថស្នាក់ការ២០១ប្រចាំផ្លូវជាតិលេខ២ បានធ្វើការស្រាវជ្រាវឃាត់ខ្លួនបានមុខសញ្ញាជនសង្ស័យ ដែលធ្វើសកម្មភាពលួចរថយន្តរបស់គេមួយគ្រឿងម៉ាកកាមរី ពណ៌ខ្មៅមួយគ្រឿង ចេញពីវត្តសន្សំកុសល ក្នុងក្រុងភ្នំពេញ គេចខ្លួនរហូតដល់ភូមិសាស្ត្រទឹកដីខេត្តតាកែវ។

ករណីលួចរថយន្តខាងលើនេះ បានកើតឡើងកាលពីវេលាម៉ោង៤ទៀបភ្លឺ ថ្ងៃទី១១ ខែមិថុនា ឆ្នាំ២០១៧ ពីចំណុចវត្តសន្សំកុសល ក្នុងសង្កាត់បឹងទំពុន ខណ្ឌមានជ័យ រាជធានីភ្នំពេញ រួចគេចខ្លួនមកដល់ភូមិសាស្ត្រទឹកដីខេត្តតាកែវ តែក៏ត្រូវកម្លាំងអាវុធហត្ថបង្ក្រាបបានធ្វើឡើងកាលពីវេលាម៉ោង២និង៤៥នាទីរសៀល ថ្ងៃទី១១ ខែមិថុនា ឆ្នាំ២០១៧ ស្ថិតនៅក្នុងភូមិសាស្ត្រទឹកដីខេត្តតាកែវ។

ចំពោះជនសង្ស័យទាំង២នាក់ប្រុសស្រីខាងលើនេះ ត្រូវបានលោកមេបញ្ជាការអាវុធហត្ថខេត្តតាកែវ បញ្ជាក់ថា គឺជាសង្សារនឹងគ្នា និងមានការជាប់ពាក់ពន្ធ័នឹងករណីលួចរថយន្តខាងលើនេះ។ ក្នុងនោះអាវុធហត្ថដកហូតបាន រថយន្តកាមរីពណ៌ខ្មៅ មួយគ្រឿង រួមនិងស្លាកលេខចំនួន២ ដូចគ្នា គឺ ភ្នំពេញ 2H-0692ផងដែរ។

បច្ចុប្បន្នជនសង្ស័យទាំង២នាក់សង្សារខាងលើនេះ ត្រូវបានអាវុធហត្ថបញ្ជូនខ្លួនទៅកាន់សាលាដំបូងខេត្តនៅរសៀលថ្ងៃទី១២ ខែមិថុនានេះ លុះល្ងាចឡើងថ្ងៃដដែល អាវុធហត្ថនឹងធ្វើការប្រគល់រថយន្តខាងលើទៅឲ្យម្ចាស់រថយន្តវិញ៕

https://youtu.be/KDgMT1D6p2s