ភ្នំពេញៈ បុរសអនាថាម្នាក់ បានស្លាប់បាត់បង់ជីវិត ដោយបានដេកស្លាប់នៅលើចិញ្ចើមផ្លូវ សង្ស័យបណ្តាលមកពីការប្រើប្រាស់ថ្នាំញៀន ទើបបណ្ដាលឲ្យគាំងបេះដូង ដេកស្លាប់ភ្លាមៗបែបនេះ។

ហេតុការណ៍នេះបានកើតឡើងកាលពីវេលាម៉ោង១និង២០នាទីយប់ឈានចូលថ្ងៃទី១៥ ខែមិថុនា ឆ្នាំ២០១៧ តាមបណ្ដោយផ្លូវ១៥៤កែងនិងផ្លូវ៦៣ នៅលើចិញ្ចើមផ្លូវ ស្ថិតក្នុងសង្កាត់ផ្សារធំថ្មី១ ខណ្ឌដូនពេញ រាជធានីភ្នំពេញ។

បើតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសអនាថារូបនេះ មិនដឹងជិះកង់មកពីណានោះទេ ខណៈមកដល់ចំណុចកើតហេតុ ក៏បានឈប់កង់ចុះមកអង្គុយនៅលើចិញ្ចើមផ្លូវ លុះអង្គុយបានមួយសន្ទុះ ស្រាប់តែដេកដួលស្លាប់ភ្លាមៗ បង្កឲ្យមានការភ្ញាក់ផ្អើលយ៉ាងខ្លាំងតែម្ដង។

ក្រោយកើតហេតុ សមត្ថកិច្ចជំនាញបានចុះមកកន្លែងកើតហេតុដើម្បីធ្វើកោសល្យវិច័យទៅលើសាកសពជនរងគ្រោះ បានឲ្យដឹងថាសាកសពខាងលើនេះមិនទាន់ស្គាល់ពីអត្តសញ្ញាណនោះទេ ចំណែកមូលហេតុនៃការស្លាប់គឺសង្ស័យថាបណ្ដាលមកពីជនរងគ្រោះបានប្រើប្រាស់នៅសារធាតុញៀន ទើបបណ្ដាលឲ្យគាំងបេះដូងស្លាប់នៅនឹងកន្លែងកើតហេតុបែបនេះព្រោះសមត្ថកិច្ចបានធ្វើការរកឃើញឧបករណ៍ប្រើប្រាស់សារធាតុញៀន និងថង់សម្រាប់ច្រកគ្រឿងញៀនដែលជាប់នៅនឹងខ្លួនសាកសព។ ចំណែកសាកសពខាងលើត្រូវបានសមត្ថកិច្ចដឹកយកទៅតម្កល់ទុកនៅវត្តទួលសង្កែ រង់ចាំសាច់ញាតិមកធ្វើបុណ្យតាមប្រពៃណី៕