ភ្នំពេញ: អគ្គិភ័យមួយ បានឆាបឆេះឡដុតកម្ទេចកំណាត់ អស់ស្ទីរទាំងស្រុង បង្កឲ្យមានការភ្ញាក់ផ្អើលយ៉ាងខ្លាំងដល់បងប្អូនប្រជាពលរដ្ឋ និងសមត្ថកិច្ចជាច្រើននាក់ចុះមកធ្វើការបាញ់ពន្លត់។

ហេតុការណ៍នេះបានកើតឡើងកាលពីវេលាម៉ោង២យប់ឈានចូលថ្ងៃទី១៧ ខែមិថុនា ឆ្នាំ២០១៧ ស្ថិតនៅចំណុចក្រុមទី៧ ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។

ម្ចាស់ឡកើតហេតុខាងលើនេះ ត្រូវបានគេស្គាល់មានឈ្មោះ សៀក ហើយបើយោងតាមប្រភពព័ត៌មានពីប្រជាពលរដ្ឋដែលនៅក្បែរកន្លែងកើតហេតុ បានឲ្យដឹងថា មុនពេលកើតហេតុ គេបានឃើញភ្លើង បានឆេះចេញពីកន្លែងដុតកំណាត់ខាងលើ ស្រាប់តែមានជាផ្សែងហុយចេញកាន់តែខ្លាំងបង្កឲ្យមានជាអណ្ដាតភ្លើងឆេះ ទើបបង្កការភ្ញាក់ផ្អើលដល់ប្រជាពលរដ្ឋ និងបានរាយការណ៍ជូនសមត្ថកិច្ចមូលដ្ឋាន ទាក់ទង់ទៅកងកម្លាំងរបស់រថយន្តពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញជាច្រើនគ្រឿង ចេញមកជួយអន្តរាគមន៍ពន្លត់មកដល់ភ្លាមៗនៅកន្លែងកើតហេតុ ដោយប្រើទឹកក្នុងការបាញ់ពន្លត់អស់ចំនួន៨ស៊ីទែន រហូតដល់ម៉ោង៤យប់ ទៀបភ្លឺទើបរលត់ទៅវិញជាស្ថាពរ។

ក្នុងនោះអគ្គិភ័យបានឆេះបំផ្លាញអស់ផ្ទះកម្មករ២ខ្នង ធ្វើពីឈើ,រោងប្រក់ឡចំនួន៤រោង និងសម្ភារ: រួមទាំងកម្ទេចកំណាត់មួយចំនួនធំផងដែរ។

ក្រោយពីកើតហេតុ សមត្ថកិច្ចជំនាញបានបញ្ជាក់ពីមូលហេតុឲ្យដឹងថា អគ្គិភ័យគឺបណ្តាលមកពីការ ឆេះចេញពីឡចំហុយដុតដោយក្រណាត់ នៅកណ្ដាលឡឥដ្ឋនេះតែម្ដង ទើបរាលដាលដូច្នេះ៕