អង់គ្លេស: ការតវ៉ាមួយ ត្រូវបានធ្វើឡើងនៅទីក្រុងឡុង ជាក្រុមអ្នកស្រុករស់នៅតំបន់កើតហេតុ ដែលធ្វើការគាំទ្រដល់អ្នករងផលប៉ះពាល់ ដោយសារអគ្គីភ័យឆេះអគារ Grenfell Tower ។ នេះបើយោងតាមសារព័ត៌មាន BBC ចេញផ្សាយនៅថ្ងៃទី១៧ ខែមិថុនា ឆ្នាំ២០១៧។

បាតុការចន្លោះពី ៥០ ទៅ ៦០ នាក់ បានសម្រុកចូលតំបន់មណ្ឌលបោះឆ្នោត Kensington និង Chelsea ដោយអ្នកទាំងនោះ បាននិយាយជាសាធារណ:ថា «អ្នករងផលប៉ះពាល់ គ្មានផ្ទះសម្បែង ចាំបាច់ត្រូវការជួយ នៅពេលឥឡូវនេះ»។

ហ្វូងបាតុករបានប្រមូលផ្តុំគ្នា នៅខាងក្រៅសាលជាកន្លែង ដែលនាយករដ្ឋមន្ត្រីលោកស្រី Theresa May បានជួបជាមួយអ្នកនៅរស់រានមានជីវិត នៅក្នុងហេតុការណ៍ឆេះអគារ និងមួយទៀត គឺក្រុមអ្នកតវ៉ា បានធ្វើវានៅឯវិមាន Downing Street ។

គួរបញ្ជាក់ដែរថា អាជ្ញាធរអង់គ្លេស កំពុងមានក្តីព្រួយបារម្ភថា ចំនួនមនុស្សស្លាប់ក្នុង​ហេតុការណ៍ឆេះ​អគារ​ កម្ពស់២៤ជាន់ អាចនឹងកើនឡើងលើសពី១០០នាក់ទៅទៀត ទោះបីជាបច្ចុប្បន្នតួ​លេខផ្លូវការ បានបញ្ជាក់ថា ជនរងគ្រោះ ដែលស្លាប់បាត់បង់ជីវិតមានត្រឹមតែ ១៧ នាក់ក៏ដោយ៕