កណ្តាល: ជនសង្ស័យម្នាក់ ធ្វើសកម្មភាពលួចកាច់សោកម៉ូតូរបស់ប្រជាពលរដ្ឋ មិនសម្រេចត្រូវជនរងគ្រោះតាមទាន់ស្រែកឆោឡោផ្អើលប្រជាពលរដ្ឋនាំគ្នាវាយម្នាក់មួយដៃមួយជើងរបួសធ្ងន់បែកក្បាល ទើបប្រគល់ឲ្យសមត្ថកិច្ច។

ហេតុការណ៍នេះបានកើតឡើងកាលពីវេលាម៉ោង៧និង៥០នាទីយប់ ថ្ងៃទី១៦ ខែមិថុនា ឆ្នាំ២០១៧ ស្ថិតនៅចំណុច ភូមិរកាធំ ឃុំបែកចាន ស្រុកអង្គស្នួល ខេត្តកណ្តាល។

ជនរងគ្រោះជាម្ចាស់ម៉ូតូមានឈ្មោះ ថន ធុច ភេទប្រុស អាយុ៣០ឆ្នាំ មុខរបរជាងជួសជុលរថយន្ត ស្នាក់នៅភូមិអូរឌឹម សង្កាត់ចោមចៅ ខណ្ឌពោធិ៍សែនជ័យ រាជ ធានីភ្នំពេញ។

ចំណែកជនសង្ស័យដែលឃាត់ខ្លួនបានមានឈ្មោះ ហុង រដ្ឋា ភេទប្រុស អាយុ២៧ឆ្នាំ មុខរបររត់ម៉ូតូឌុប ស្នាក់នៅភូមិផ្សារកំបូល សង្កាត់កំបូល ខណ្ឌពោធិ៍សែនជ័យ។ចំណែកបក្ខពួកម្នាក់ទៀតគេចខ្លួនបាត់។

ក្នុងនោះម៉ូតូដែលជនសង្ស័យធ្វើសកម្មភាពលួចនោះគឺម៉ាក សង់សេ១២៥ ពណ៌ខ្មៅ ឆ្នាំ២០១៤ ពាក់ស្លាកលេខ ភ្នំពេញ 1CM-8869 និងមួយគ្រឿងទៀតម៉ាក សេ១២៥ពណ៌ខ្មៅមិនច្បាស់ស៊េរី(ជាម៉ូតូដែលជនសង្ស័យជិះធ្វើសកម្មភាព)។

មុនពេលកើតហេតុ ជនរងគ្រោះបានអង្គុយហូបបាយនៅក្នុងផ្ទះ ដោយបានចតម៉ូតូខាងមុខផ្ទះ មិនបានបិទសន្ទះសោនោះទេ។ ពេលកំពុងហូបាយ មីងរបស់ខ្លួនក៏ដើរចេញមកក្រៅផ្ទះស្រាប់តែឃើញជនសង្ស័យម្នាក់កំពុងកាច់សោកម៉ូតូរួចជិះឆ្ពោះទៅទិសខាងជើង ភ្លាមនោះមីងជនរងគ្រោះក៏ស្រែកឆោឡោព្រមទាំងទូរសព្ទ
ប្ដឹងសមត្ថកិច្ច ហើយសមត្ថកិច្ចក៏ធ្វើការពួនស្ទាក់មួយសន្ទុះក្រោយមកសមត្ថកិច្ច ក៏ឃាត់បានជនសង្ស័យម្នាក់នៅភូមិទន្លាប់ ឃុំទួលព្រេជ ស្រុកអង្គស្នួល ខេត្តកណ្ដាលឃាត់បានទាំងម៉ូតូជនរងគ្រោះមកវិញ ចំណែកជនសង្ស័យម្នាក់ទៀតដែលជិះម៉ូតូធ្វើសកម្មភាពក៏ជិះគេចខ្លួនបាត់ទៅ។

បច្ចុប្បន្នជនសង្ស័យរួមនឹងវត្ថុតាង ត្រូវបានសមត្ថកិច្ចបញ្ជូនខ្លួនមកកាន់អធិការដ្ឋាននគរគរបាលស្រុក ដើម្បីចាត់ការតាមនីតិវិធីច្បាប់បន្តទៀត៕