កណ្តាល: ករណីគ្រោះថ្នាក់ចរាចរណ៍រវាងម៉ូតូ និងម៉ូតូ បណ្តាលឲ្យមនុស្ស៣នាក់ រងរបួសធ្ងន់។
កើតហេតុនៅវេលាម៉ោង២ និង៤០នាទីរសៀល ថ្ងៃទី១៧ ខែមិថុនា ឆ្នាំ២០១៧ ត្រង់ចំណុចចន្លោះគីឡូម៉ែត្រ១៨-១៩ ស្ថិតក្នុងភូមិទួលក្របៅ ឃុំគគីរ ស្រុកកៀនស្វាយ ខេត្តកណ្ដាល។

ម្ចាស់ម៉ូតូ ម៉ាកហុងដា សេ១២៥ ពណ៌ខ្មៅ ពាក់ស្លាកលេខ ភ្នំពេញ1GT.9264ឈ្មោះ ហែន តុលា ភេទប្រុស អាយុ១៩ឆ្នាំ មុខរបរ កសិករ ឌុបគ្នាម្នាក់ទៀតឈ្មោះ សម្បត្តិ វិច្ឆការ ភេទប្រុស អាយុ១៩ឆ្នាំ មុខរបរ កសិករ មានទីលំនៅភូមិ ទួលក្របៅ ឃុំគគីរ ស្រុកកៀនស្វាយ ខេត្តកណ្ដាល។ ចំណែកម្ចាស់ម៉ូតូ ម៉ាកសង់កូរ៉េ គ្មានស្លាកលេខ ភេទប្រុស មិនស្គាល់ឈ្មោះ។

មុនពេលកើតហេតុ ម្ចាស់ម៉ូតូម៉ាកហុងដា សេ១២៥ បានជិះម៉ូតូឌុបគ្នាចេញពីផ្លូវលំភូមិទួលក្របៅ លុះមកដល់ចំណុចកើតហេតុខាងលើ បានបើកម៉ូតូបុកជាមួយម្ចាស់ម៉ូតូម៉ាកសង់កូរ៉េ ខាងស្ដាំដៃក្នុងទិសដៅស្របគ្នាពេញទំហឹងបណ្ដាលឲ្យរបួសធ្ងន់ទាំងសងខាង។

ក្រោយពីកើតហេតុ ជនរងគ្រោះទាំងសងខាងត្រូវបានបញ្ជូនទៅមន្ទីរពេទ្យបង្អែកឃុំភូមិធំ ចំណែកវត្ថុតាងផ្នែកជំនាញធ្វើការវាស់វែងយកមករក្សាទុកនៅអធិការដ្ឋាននគរបាលស្រុកកៀនស្វាយ៕