ភ្នំពេញ: រថយន្តម៉ាកព្រុសមួយគ្រឿង បើកបរក្នុងល្បឿនលឿន ជ្រុលទៅបុករបាំងថ្មចែកទ្រូងផ្លូវពេញទំហឹង បណ្តាលឲ្យរងការខូចខាតរថយន្តយ៉ាងដំណំ។

ហេតុការណ៍នេះបានកើតឡើងកាលពីវេលាម៉ោង១១និង២០នាទីយប់ ថ្ងៃទី១៨ ខែមិថុនា ឆ្នាំ២០១៧ ស្ថិតនៅចំណុចស្តុបចម្ការមន តាមបណ្តោយផ្លូវនរោត្តម ស្ថិតក្នុងសង្កាត់ទន្លេបាសាក់ ខណ្ឌចម្ការមន រាជធានីភ្នំពេញ។

ប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញរថយន្តបង្កម៉ាកព្រុស ពណ៍ទឹកប្រាក់ ពាក់ស្លាកលេខ ភ្នំពេញ2Q-6897 បើកបរដោយបុរសម្នាក់ធ្វើដំណើរតាមបណ្តោយផ្លូវនរោត្តមក្នុងទិសដៅពីត្បូងទៅជើង ក្នុងល្បឿនលឿន ខណ:មកដល់ចំណុចកើតហេតុ ស្រាប់តែរេចង្កូតទៅបុកនឹងរបាំងថ្មចែកទ្រូងផ្លូវពេញទំហឹង បណ្តាលរងការខូចខាតអស់១កង់ ចំណែករថយន្តខូចផ្នែកខាងមុខយ៉ាងដំណំ រីម្ចាស់រថយន្តសំណាងណាស់ដែលបានពោងសុវត្ថិភាពទាំង២ផ្ទុះទប់កុំឲ្យមានរបួស។

ក្រោយកើតហេតុសមត្ថកិច្ចចរាចរណ៍មូលដ្ឋាន បានចុះមកដល់ចំណុចកើតហេតុនិងទំនាក់ទំនងហៅនគរបាលជំនាញចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ យកស្ទូចយករថយន្តបង្កទៅរក្សាទុក រួមទាំងម្ចាស់រថយន្ត ដើម្បីរង់ចាំធ្វើការដោះស្រាយគ្នាពេលក្រោយ តាមផ្លូវច្បាប់បន្តទៀត៕