ភ្នំពេញ: ចោរស្រីម្នាក់ជំនាញខាងលូកវះហោប៉ៅរបស់បងប្អូនប្រជាពលរដ្ឋ ត្រូវបានសមត្ថកិច្ចឃាត់ខ្លួន បន្ទាប់ពីរូបគេធ្វើសកម្មភាពលូក និងវះហោប៉ៅកម្មការិនីរោងចក្រ២នាក់ យកទូរស័ព្ទចំនួន ២គ្រឿង ជាបន្តបន្ទាប់ ត្រូវបានម្ចាស់ដឹងខ្លួនទាន់ចាប់ក្របួចបានប្រគល់ឲ្យសមត្ថកិច្ច។

ហេតុការណ៍នេះបានកើតឡើងកាលពីវេលាម៉ោង១២ថ្ងៃត្រង់ នាថ្ងៃទី២០ ខែមិថុនា ឆ្នាំ២០១៧ នៅត្រង់ចំណុចមុខរោងចក្រកាត់ យីហោ (ខៃថាន) ផ្លូវបេតុង ភូមិទួលគោក សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យខាងលើឈ្មោះ ឈុន សៀក ភេទស្រី អាយុ២០ឆ្នាំ មុខរបរមិនពិតប្រាកដ មានទីលំនៅ ភូមិអន្លុងក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។ ចំណែកឯស្ត្រីរងគ្រោះទាំង ២នាក់ ទី១ឈ្មោះ គ្រី ធីដា ភេទស្រី អាយុ៣៣ឆ្នាំ មុខរបរ កម្មការិនីរោងចក្រ មានទីលំនៅ ភូមិលូ សង្កាត់ស្វាយប៉ាក រាជធានីភ្នំពេញ និងទី២ឈ្មោះ យន សុភារី ភេទស្រី អាយុ២២ឆ្នាំ មុខរបរកម្មការិនីរោងចក្រ ស្នាក់នៅបន្ទប់ជួល ភូមិទួលគោក សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។​

ស្ត្រីរងគ្រោះទាំង២នាក់បានប្រាប់ឲ្យដឹងថា នៅមុនពេលកើតហេតុ រូបនាងទាំង២នាក់ បានដើរចេញពីធ្វើការរោងចក្រ ក្នុងគោលបំណងទៅហូបបាយនៅមុខរោងចក្រ ក្រោយមករូបនាងបានពេលដើរទៅទិញពងទាកូន ខណៈពេលកំពុងឈរទិញពងទាកូន ស្រាប់តែមានស្ត្រីម្នាក់បានដើរមកជិត រួចឈរគៀកហើយបានធ្វើសកម្មភាពលូកហោប៉ៅ និងវះថង់កៅស៊ូររបស់នាងទាំង២នាក់ ដោយយកទូរស័ព្ទដៃចំនួន ២គ្រឿង គឺម៉ាក iPhone 5 បានសម្រេចជាបន្តបន្ទាប់ តែត្រូវអស់លក្ខណ៍ ក៏ត្រូវបានអ្នកលក់ពងទាកូនឃើញ ក៏បានស្រែកប្រាប់នាងទាំង ២នាក់ថា មានស្ត្រីម្នាក់ដែលឈរជិតនោះលួចយកទូរស័ព្ទដៃនាងអស់ហើយ។ ភ្លាមៗនោះ ស្ត្រីទាំង២នាក់ខាងលើ មានការសង្ស័យលើស្ត្រីម្នាក់នោះ ក៏បានចាប់និងឆែកឆេររកឃើញទូរស័ព្ទដៃចំនួន ២គ្រឿង ដែលជារបស់នាងទាំង២នាក់ ហើយក៏បានចាប់ឃាត់ខ្លួនប្រគល់ឲ្យសមត្ថកិច្ច ដើម្បីយកទៅសាកសួរបន្ត។​ ក្រោយពីធ្វើការសាកសួរជនសង្ស័យខាងលើរួចមក រូបគេបានសារភាពថា ខ្លួនពិតជាបានធ្វើសកម្មភាពលូកហោប៉ៅ និងវះថង់កៅស៊ូពិតប្រាកដមែន ហើយចំណែកឯសំភារៈខាងលើ ត្រូវបានសមត្ថកិច្ចប្រគល់ជូនទៅម្ចាស់ដើមវិញ។

បច្ចុប្បន្នជនសង្ស័យខាងលើ ត្រូវសមត្ថកិច្ចបញ្ជូនខ្លួនទៅឃុំជាបណ្តោះអាសន្ន នៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការបន្តតាមនីតិវិធីច្បាប់៕