ភ្នំពេញៈ មានករណីនារីម្នាក់ធ្វើអត្តឃាតចងកសម្លាប់ខ្លួនមួយបានកើតឡើងនៅក្នុងផ្ទះសំណាក់មួយកន្លែងយីហោ”រ៉ូល” បង្កការភ្ញាក់ផ្អើល។

ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង៧និង៥០នាទី ថ្ងៃទី១៨ ខែមិថុនា ឆ្នាំ២០១៧ ត្រង់ផ្ទះសំណាក់រ៉ូល ភូមិក្បាលដំរី សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។

ប្រភពព័ត៌មានបានឲ្យដឹងថា ជនរងគ្រោះមានឈ្មោះ សៅ គីមសែ ហៅ ទ្រីកា ភេទស្រី អាយុ២០ឆ្នាំ មានមុខរបរជាបុគ្គលិក អ៊ីនធើណែត សព្វថ្ងៃស្នាក់នៅរាជធានីភ្នំពេញ (ពុំស្គាល់កន្លែង) មានស្រុកកំណើតនៅ ភូមិក្ដុល ឃុំក្រាំងស្គា ស្រុកទឹកផុស ខេត្តកំពង់ឆ្នាំង។

ប្រភពដដែលបានបន្តថា តាមការបំភ្លឺពីរម្ចាស់ផ្ទះសំណាក់បានបញ្ចាក់ឲ្យដឹងថា នៅថ្ងៃទី១៨ ខែមិថុនា ឆ្នាំ២០១៧ វេលាម៉ោងប្រហែលជា២ ឈ្មោះ សៅ គីមសែ បានជិះរ៉ឺម៉កកង់បីមកជួលបន្ទប់ស្នាក់នៅ លុះដល់ថ្ងៃទី២០ ខែមិថុនា ឆ្នាំ២០១៧ ដោយមិនឃើញជនរងគ្រោះចេញពីបន្ទប់មកសោះ ក៏មានការសង្ស័យហើយទៅគោះទ្វាហៅតែមិនឃើញឆ្លើយតប គាត់ក៏យកសោរមកចាក់ទ្វាបន្ទប់ក៏ឃើញនាងបានចងករស្លាប់បាត់ទៅហើយ។

ក្រោយពេលកើតហេតុ តាមការពិនិត្យកោសល្យវិច្ច័យក្រុងនិងគ្រូពេទ្យកោសល្យវិច្ច័យក្រុង លោក វេជ្ជបណ្ឌិត នង សុវណ្ណារ័ត្ន សពគឺពុំមានពាក់ព័ន្ធនឹងឃាដកម្មនោះទេ គឺពិតជាចងករស្លាប់ខ្លួនឯងមែន ហើយក្រុមគ្រួសារនៃសព ក៏ពុំបានប្ដឹងផ្ដល់ទៅលើបុគ្គលណាដែរ និងសូមយកសពទៅធ្វើបុណ្យតាមប្រពៃណីនៅស្រុកកំណើត៕