ព័ត៌មានជាតិ

តុលាការកាត់ទោសបុរសជាប្តី ដែលយកវែកវាយប្រពន្ធរហូតស្លាប់

ភ្នំពេញ: ទីបំផុតបុរសជាប្តី ដែលយកវែកសម្លវាយប្រពន្ធខ្លួនឯងរហូតដល់ស្លាប់ ត្រូវបានលោក អ៊ឹម វណ្ណ: ប្រធានក្រុមប្រឹក្សាចៅក្រមជំនុំជម្រះសាលាដំបូងរាជធានីភ្នំពេញ នៅព្រឹកថ្ងៃទី២២ ខែមិថុនា ឆ្នាំ២០១៧នេះ បើកសវនាការជំនុំជម្រះទោស ជាសាធារណ:ហើយ។

លោក សេង ហៀង តំណាងអយ្យការបានចោទប្រកាន់ជនជាប់ចោទឈ្មោះ សន អឿន ភេទប្រុស អាយុ ៣៨ឆ្នាំ មុខរបរជាអ្នករត់ម៉ូតូឌុប ពីបទ ហិង្សាដោយចេតនាមានស្ថានទម្ងន់ទោសដោយសារមរណភាពនៃជនរងគ្រោះ ជាប្រពន្ធឈ្មោះ ខេន ស្រីខួច ភេទស្រី អាយុ ២៧ឆ្នាំ មុខរបរ មេផ្ទះ ប្រព្រឹត្តកាលពីយប់ថ្ងៃទី៥ ខែមករា ឆ្នាំ២០១៧ នៅចំណុចផ្ទះជួល ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ យោងតាមមាត្រា ២១៧ និងមាត្រា២២៤នៃក្រមព្រហ្មទណ្ឌ។

នៅក្នុងសវនាការជនជាប់ចោទឈ្មោះ សន អឿន បានសារភាបថា នៅយប់កើតហេតុថ្ងៃទី៥ ខែមករា ឆ្នាំ២០១៧ ខ្លួនពិតជាបានវាយប្រពន្ធមែន ដោយសារតែខឹង ប្រពន្ធស្តីបន្ទោសរឿង ផឹកស្រា និងបានយកវែកសម្លមកវាយលើខ្លួនមុន ទើបខ្លួនខឹងក៏តដៃ វាយវិញ ប៉ុន្តែគ្មានបំណងវាយឲ្យប្រពន្ធស្លាប់នោះទេ។ ជនជាប់ចោទបន្ដថា លុះព្រឹកឡើងថ្ងៃទី៦ ខែមករា ឆ្នាំ២០១៧ ខ្លួនបានហៅរឺម៉កកង់៣ ដឹកប្រពន្ធទៅមន្ទីរពេទ្យបង្អែកពោធិ៍ចិនតុង ប៉ុន្តែគ្រូពេទ្យ បានប្រាប់ថា ប្រពន្ធខ្លួនស្លាប់ហើយ។ ដោយខ្លាចគេដឹងរឿង ខ្លួនវាយប្រពន្ធស្លាប់ ខ្លួនបានប្រាប់គ្រូពេទ្យថា ប្រពន្ធដួលបោកក្បាលក្នុងបន្ទប់ទឹក ប៉ុន្តែនៅពេលភ្លាមនោះក៏ដឹងដល់សមត្ថកិច្ច មកឃាត់ខ្លួន ដោយសារតែសមត្ថកិច្ចរកឃើញថា ប្រពន្ធខ្លួន ត្រូវបានខ្លួនវាយសម្លាប់មិនមែនដួលក្នុងបន្ទប់ទឹកស្លាប់នោះទេ។

ទោះជាយ៉ាងណា សំណុំរឿងនេះ ត្រូវបានតុលាការលើកពេលទៅប្រកាសសាលក្រមនៅព្រឹកថ្ងៃទី៥ ខែកក្កដា ឆ្នាំ២០១៧ខាងមុខវិញ៕

មតិយោបល់