ឧត្តរមានជ័យៈ លោកអធិការស្រុកអន្លង់វែង បានប្រាប់ Post News ថា នៅវេលាម៉ោង៦ និង១០នាទីយប់ ថ្ងៃទី២២ ខែមិថុនា ឆ្នាំ២០១៧ មានករណីគ្រោះថ្នាក់ចរាចរណ៍មួយកើតទ្បើង នៅលើកំណាត់ផ្លូវជាតិលេខ ១៧៤ ស្ថិតនៅភូមិទួលគ្រួស ឃុំថ្លាត ស្រុកអន្លង់វែង ដោយរថយន្តអ៊ីស៊ុស៊ុ បុកជាមួយរថយន្តសាំយ៉ុង បណ្តាលឲ្យរងរបួសធ្ងន់ចំនួន៤នាក់ ស្រី២នាក់ របួសស្រាល១នាក់ប្រុស។

អ្នកបើកររថយន្តសាំយ៉ុង ឈ្មោះ ស្រោង ចិន្តា ភេទប្រុស អាយុ៣១ឆ្នាំ ស្នាក់នៅ ស្រុក ត្រពាំងប្រសាទ ពណ៌សំបកឪឡឹក ពាក់ស្លាកលេខ ភ្នំពេញ2 Z-7603 បណ្តាលឲ្យរបួសធ្ងន់ និងអ្នករួមដំណើរ ចំនួន៣នាក់៖ ទី១ឈ្មោះ យាង ហុន ភេទ ស្រី អាយុ៤៦ឆ្នាំ ស្នាក់នៅភូមិ- ឃុំ- ស្រុក ត្រពាំងប្រសាទ (របួសចង្កេះធ្ងន់), ទី២ ឈ្មោះ ស្រ៊ុន ឡាឌី ភេទប្រុស អាយុ៣៤ ឆ្នាំ ស្នាក់នៅភូមិជាមួយគ្នា(របួស បែកលើចិញ្ចើមស្តាំធ្ងន់) និងទី៣ ឈ្មោះ ផន ស្រីឌី ភេទស្រី អាយុ១៧ ឆ្នាំ ស្នាក់នៅភូមិជាមួយគ្នា(ពោះធំគ្រប់ខែ) បណ្តាលឲ្យរងរបួសធ្ងន់បាក់ភ្លៅខាងស្តាំ។

ចំណែកអ្នកបើកបររថយន្តម៉ាក IZUZU ឌីម៉ិច ឈ្មោះ មុំ រតនា ភេទប្រុស អាយុ៣៥ឆ្នាំ ស្នាក់នៅភូមិពពេលសែនជ័យ ឃុំផ្អាវ ស្រុកត្រពាំងប្រាសាទ ជាទាហ៊ានវរសេនាតូច ៤១៣ ពណ៌ត្រេអ៊ី ពាក់ស្លាកលេខ ខេមរភូមិន្ទ 2-2175 ចង្កូតស្តាំ រងរបួសស្រាល។

លោកអធិការស្រុកបានបញ្ជាក់ពីមូលហេតុគ្រោះថ្នាក់ចរាចរណ៍ខាងលើ ដោយសាររថយន្ត IZUZU ឌីម៉ិច រ៉េចង្កូតទៅបុករថយន្តសាំយ៉ុងពេញទំហឹង៕