សៀមរាប: លោកអធិការស្រុកពួក បានប្រាប់ Post News ថា ស្រ្តីជាម្តាយម្នាក់ ត្រូវបានសមត្ថកិច្ចឃាត់ខ្លួន ពាក់ពន្ធ័ករណីឃាតកម្ម បានច្របាច់ច្រមុះកូនស្រីរបស់ខ្លួន អាយុ២០ថ្ងៃបណ្តាលឲ្យស្លាប់។

ហេតុការណ៍នេះបានកើតឡើងនៅវេលាម៉ោង១០ព្រឹក ថ្ងៃទី ២៣ ខែមិថុនា ឆ្នាំ ២០១៧ នៅផ្ទះម្តាយក្មេកឈ្មោះ ជឹង ភឹម អាយុ៥៦ឆ្នាំ ស្នាក់នៅភូមិគោកត្រាច ឃុំខ្នាត ស្រុកពួក ខេត្តសៀមរាប។

ជនសង្ស័យឈ្មោះ សែម រ៉ាន ភេទស្រី អាយុ១៨ឆ្នាំ មុខរបរ ធ្វើស្រែ ស្នាក់នៅភូមិប្រាសាទចារ្យ ឃុំដូនកែវ ស្រុកពួក ខេត្តសៀមរាប។ ចំណែកកូនស្រីមានឈ្មោះ ផន ស្រីនាង អាយុ២០ថ្ងៃ។ ទើបតែមកលេងបាន២ថ្ងៃនៅផ្ទះម្តាយក្មេក ពេលកើតហេតុប្តីឈ្មោះ រត្ន័ ផន ហៅចាម អាយុ២៣ឆ្នាំ ទៅធ្វើការកម្មករសំណង់។

ក្រោយពេលកើតហេតុជនសង្សយ័ជិះម៉ូតូទៅស្រុកកំណើតរបស់ខ្លួន ត្រូវបានសមត្ថកិច្ចឃាត់ខ្លួន ធ្វើការសាកសួរនៅអធិការនគរបាលស្រុក ។ ចំណែកសាកសព កម្លាំងជំនាញស្រុកសហការកណ្តាលយុត្តិធ៌មនិងគ្រូពេទ្យកំពុងពិនិត្យ ។
ក្រោយការពិនិត្យ គ្រូពេទ្យសន្និដ្ឋានថាជនរងគ្រោះស្លាប់ដោយសារស្ទះផ្លូវដង្ហើម៕