ព័ត៌មានជាតិ

លួចទូរសព្ទIphone 6Plusមកលក់ ត្រូវម្ចាស់តាមទាន់ស្រែកផ្អើល សមត្ថកិច្ចឃាត់ខ្លួន

ភ្នំពេញ: ជនសង្ស័យម្នាក់ លួចទូរសព្ទIphone 6Plus ១គ្រឿងពីហាងកាហ្វេមួយកន្លែងនៅក្នុងសង្កាត់ស្រះចក យកមកលក់នៅផ្សារឈូកមាស សង្កាត់ក្រាំងធ្នង់ តែត្រូវម្ចាស់តាមទាន់ស្រែកផ្អើល សមត្ថកិច្ចឃាត់ខ្លួន។

ហេតុការណ៍នេះបានកើតឡើងកាលពីវេលាម៉ោង៣ និង៣០នាទី រសៀល ថ្ងៃទី២៤ ខែមិថុនា ឆ្នាំ២០១៧ ស្ថិតនៅផ្សារឈូកមាស ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ។

នារីរងគ្រោះជាម្ចាស់ទូរសព្ទមានឈ្មោះ វិន សុផាត អាយុ២៦ឆ្នាំ មុខរបរ ម្ចាស់ហាងកាហ្វេ ស្នាក់នៅហាងការហ្វេ៨៨៨ ផ្លូវ៦៣ សង្កាត់ស្រះចក ខណ្ឌដូនពេញ។ ជនសង្ស័យមានឈ្មោះ លឹម រស្មី អាយុ៣៣ឆ្នាំ មុខរបរ រត់ម៉ូតូឌុប ស្នាក់នៅភូមិពង់មង្គល ឃុំព្រែកព្នៅ ស្រុកពញាឮ ខេត្តកណ្តាល។

ប្រភពព័ត៌មានពីនារីម្ចាស់ទូរសព្ទបានឱ្យដឹងថា មុនពេលកើតហេតុ ជនសង្ស័យបានចូលទៅផឹកកាហ្វេនៅហាងរបស់គាត់ ដោយគាត់ជាប់រវល់ ហើយបានទុកទូរសព្ទនៅក្នុងថតតុ ហើយត្រូវជនសង្ស័យខាងលើលួចហើយចាកចេញពីកន្លែងកើតហេតុបាត់។

ប្រភពដដែលបន្តថា ក្រោយមកគាត់បានឆែកមើលតាមអាយខ្លោតក៏ឃើញនៅម្តុំផ្សារឈូកមាស ព្រោះជនសង្ស័យបានយកមកលក់នៅទីនោះ តែនៅតែរកមិនឃើញ ក្រោយមកដោយមានការសហការ ពីអ្នកលក់និងទិញទូរសព្ទតាមហ្វេសបុករបស់ខ្លួននៅជាប់ទូរសព្ទនោះប្រាប់អស័យដ្ឋានក៏មកទាន់ជនសង្ស័យតែម្តងរួចនាំគ្នាប្រគល់ឱ្យសមត្ថកិច្ចចាត់ការតាមច្បាប់។

ក្រោយពេលកើតហេតុសមត្ថកិច្ចប៉ុស្តិ៍ក្រាំងធ្នង់បានឃាត់ខ្លួនជនសង្ស័យហើយក៏ប្រគល់ជននោះទៅនគរបាលប៉ុស្តិ៍ស្រះចកដែលជាម្ចាសករណីចាត់ការបន្តតាមនីតិវិធី៕

មតិយោបល់