ភ្នំពេញៈ សមត្ថកិច្ចឃាត់ខ្លួន យុវជនម្នាក់ ក្រោយពីធ្វើសកម្មភាពឆក់កាបូប ស្ដ្រីជាគ្រូបង្រៀនសាលាប៊ែលធីអន្តរជាតិ បានសម្រេច។ ការចាប់ឃាត់ខ្លួនបានធ្វើឡើងនៅវេលាម៉ោង៨ និង៣០នាទីយប់ ថ្ងៃទី២៨ ខែមិថុនា ឆ្នាំ២០១៧ ទល់មុខវត្តសន្សំកុសល សង្កាត់បឹងទំពុន ខណ្ឌមានជ័យ។

សមត្ថកិច្ចបានឲ្យដឹងថា ជនរងគ្រោះ ជាអ្នកគ្រូបង្រៀននៅសាលាប៊ែលធីអន្តរជាតិ។ ចំណែកជនសង្ស័យខាងលើឈ្មោះ ដា រ៉ាវុធ ភេទប្រុស អាយុ១៥ មុខរបរសិស្សនៅសាលាជាស៊ីមផ្សារដើមថ្កូវ ស្នាក់នៅកន្លែងកើតហេតុខាងលើ។

ប្រភពព័ត៌មានជនរងគ្រោះបានឲ្យដឹងថា មុនពេលកើតហេតុ គាត់ជិះម៉ូតូឌុបចេញពីបង្រៀនសិស្ស ត្រលប់ទៅផ្ទះវិញ លុះមកដល់កន្លែងកើតហេតុ ស្រាប់តែមានជនសង្ស័យ២នាក់ ធ្វើសកម្មភាពឆក់យកកាបូបគាត់បានសម្រេច ។ ហើយជនសង្ស័យបានជិះរត់ក៏ជ្រុលទៅបុកនឹងម៉ូតូ១គ្រឿងទៀត បណ្ដាលឲ្យដួលម៉ូតូ ត្រូវបានប្រជាពលរដ្ឋឃាត់ខ្លួនបានម្នាក់ជាអ្នកឌុប និងអ្នកជិះខាងក្រោយបានរត់គេចខ្លួន យកកាបូបរបស់ជនរងគ្រោះយកទៅបាត់តែម្តង។ ក្រោយពេលកើតហេតុ ជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលបឹងទំពុន។

តាមចម្លើយសារភាពរបស់ជនសង្ស័យ ពិតជាបានធ្វើសកម្មភាពឆក់កាបូបពីជនរងគ្រោះពិតប្រាកដមែន ហើយមិនបានដឹងថា ជនរងគ្រោះខាងលើជាគ្រូបង្រៀនរបស់គេទេ នៅពេលដែលធ្វើសកម្មភាពឆក់បានហើយទើបដឹងថា ជាគ្រូបង្រៀនរបស់គេ ធ្លាប់បង្រៀននៅសាលាប៊ែលធី។

បច្ចុប្បន្ន ជនសង្ស័យ ត្រូវសមត្ថកិច្ចឃុំខ្លួនជាបណ្តោះអាសន្ន ដើម្បីកសាងសំណុំរឿង ចាត់ការបន្តតាមនីតិវិធីច្បាប់៕