ភ្នំពេញ: គ្រោះថ្នាក់ចរាចរណ៍មួយបង្កឡើងដោយរថយន្ដម៉ាក Nissan Frontier មួយគ្រឿង បើកក្នុងល្បឿនលឿន សង្ស័យម្ចាស់ងងុយដេក បានបុកឡើងឃឿនសួនច្បារ និងដើមផ្កាចំប៉ី បាក់អស់១ដើម ធ្វើឲ្យរថយន្ដកល់ជាប់នឹងគល់ឈើទៅមុខលែងរួច បណ្ដាលឲ្យអ្នកជិះក្នុងរថយន្ដរងរបួសម្នាក់។

ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង៣ទៀបភ្លឺ ថ្ងៃទី៣០ ខែមិថុនា ឆ្នាំ២០១៧ ស្ថិតនៅចំណុចជិតក្ដាន់២ តាមបណ្ដោយមហាវិថីសហព័ន្ធរុស្ស៊ី ក្នុងសង្កាត់មិត្តភាព ខណ្ឌ៧មករា រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញរថយន្ដម៉ាក Nissan Frontier ពណ៌ប្រផេះ ពាក់ស្លាកលេខ ភ្នំពេញ 2AH-2782 ជិះជាលក្ខណ:គ្រួសារ ធ្វើដំណើរតាមបណ្ដោយមហាវិថីសហព័ន្ធរុស្ស៊ី ទិសដៅពីលិចទៅកើតក្នុងល្បឿនលឿន ពេលមកដល់ចំណុចកើតហេតុទំនងជាអ្នកបើករថយន្ដងងុយដេក បានរេចង្កូតទៅបុកឡើងឃឿនសួនច្បារចិញ្ចើមផ្លូវ និងបន្តទៅបុកដើមផ្កាចំប៉ីបណ្ដាលឲ្យបាក់អស់១ដើម កល់រថយន្ដជាប់ទៅមុខលែងរួច និងបណ្ដាលឲ្យស្ត្រីម្នាក់ដែលជិះក្នុងរថយន្ដរងរបួសផងដែរ។

ប្រភពបានដដែលបន្តថា ក្រោយពីកើតហេតុអ្នកជិះនៅក្នុងរថយន្ដបាននាំគ្នាចុះពីរថយន្ដហើយបានដឹកស្ត្រីដែលរងរបួសទៅសង្គ្រោះនៅឯមន្ទីរពេទ្យ បន្ទាប់មកកម្លាំងសមត្ថកិច្ចមូលដ្ឋានបានចុះដល់កន្លែងកើតហេតុនិងបានទំនាក់ទំនងទៅកម្លាំងជំនាញចរាចរណ៍ចុះធ្វើការវាស់វែងស្ទូចយករថយន្ដបង្កទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយតាមផ្លូវច្បាប់នៅពេលក្រោយតាមផ្លូវច្បាប់៕