ភ្នំពេញៈ ជនសង្ស័យម្នាក់ ធ្វើសកម្មភាពលួចឆ្កឹះសោបន្ទប់ជួលរបស់កម្មការិនីរោងចក្រ ត្រូវបានម្ចាស់គេទាន់ ស្រែកឆោឡោផ្អើលដល់សមត្ថកិច្ចចាប់ខ្លួនបានភ្លាមៗតែម្តង។

ហេតុការណ៍នេះបានកើតឡើងកាលពីវេលាម៉ោង៩និង៣០នាទី ព្រឹក ថ្ងៃទី១ ខែកក្កដា ឆ្នាំ២០១៧ ស្ថិតនៅចំណុចភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យដែលចាប់ខ្លួនបានខាងលើមានឈ្មោះ អ៊ី បញ្ញា ភេទប្រុស អាយុ១៦ឆ្នាំ មុខរបរសិស្ស ស្នាក់នៅភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅភូមិត្រពាំងប្រិយ ឃុំចំបក់ ស្រុកប៉ាទី ខេត្តតាកែវ។ ចំណែកជនរងគ្រោះមានឈ្មោះ លៀប ណារិន ភេទស្រី អាយុ២១ឆ្នាំ មុខរបរកម្មការិនីរោងចក្រ ស្នាក់នៅបន្ទប់ជួល ក្នុងភូមិកើតហេតុខាងជាមួយជនសង្ស័យ មានស្រុកកំណើត នៅភូមិក្រសាំង ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ។

តាមប្រភពព័ត៌មានពីជនរងគ្រោះបានឲ្យដឹងថា មុនពេលកើតហេតុ វេលាម៉ោងប្រហែល៩ព្រឹកថ្ងៃកើតហេតុ រូបគាត់បានចេញ ទៅក្រៅមួយភ្លែត លុះត្រឡប់មកវិញ ស្រាប់តែឃើញ ជនសង្ស័យយកកូនសោ មកចាក់បន្ទប់របស់ខ្លួន ក៏បានស្រែកឆោឡោ ទើបមានផ្អើលដល់សមត្ថកិច្ច ប៉ុស្តិ៍ចោមចៅ ធ្វើការឃាត់ខ្លួនបានភ្លាមៗតែម្តង។

បច្ចុប្បន្នជនសង្ស័យ ត្រូវបានសមត្ថកិច្ចនគរបាលប៉ុស្តិ៍ចោមចៅ ធ្វើការឃាត់ខ្លួននិងធ្វើការសាកសួរ ដើម្បីកសាងសំណុំរឿងបញ្ជូនខ្លួនទៅកាន់អធិការដ្ឋាននគរបាលខណ្ឌពោធិ៍សែនជ័យ ដើម្បីកសាងសំណុំរឿងបន្តបញ្ជូនខ្លួនទៅកាន់តុលាការចាត់ការតាមផ្លូវច្បាប់៕