ភ្នំពេញ: ជនសង្ស័យម្នាក់ ត្រូវបានសន្តិសុខនិងសមត្ថកិច្ចចាប់ខ្លួនបានភ្លាមៗ ខណ:ដែលកំពុងធ្វើសកម្មភាពកាប់ប្រហារទៅលើបុរសម្នាក់ជាច្រើនកាំបិត បណ្តាលឲ្យរងរបួសយ៉ាងធ្ងន់ធ្ងរ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។ ហេតុការណ៍នេះបានកើតឡើងកាលពីវេលាម៉ោង៨និង៣០នាទី ព្រឹកថ្ងៃទី៦ ខែកក្កដា ឆ្នាំ២០១៧ ស្ថិតនៅចំណុចក្នុងអាកាសយានដ្ឋានអន្តរជាតិភ្នំពេញ ​ក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនបានខាងលើនេះមានឈ្មោះ កែវ ភារម្យ ភេទប្រុស អាយុ២៥ឆ្នាំ មុខរបរអ្នកទទួលភ្ញៀវចុះពីលើយន្តហោះ ស្នាក់នៅផ្ទះលេខ ១៨UH ផ្លូវK៤A ភូមិស្លែងរលើង សង្កាត់ទឹកថ្លា ខណ្ឌសែនសុខ។ ចំណែកជនរងគ្រោះមានឈ្មោះ កែវ សូថា ភេទប្រុស អាយុ៥១ឆ្នាំ មុខរបរជា ជំនួយការលោកឧកញ្ញ៉ា អ៊ឹង ប៊ុនហ៊ូវ ស្នាក់នៅផ្ទះតាមបណ្តោយផ្លូវ៥៩៨ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឬស្សីកែវ រងរបួសធ្ងន់កំពុងសម្រាកព្យាបាលនៅមន្ទីរពេទ្យរ៉ូយ៉ាល់ភ្នំពេញ។

យោងតាមប្រភពព័ត៌មានបានឲ្យដឹងថា មុនពេលកើតហេតុជនរងគ្រោះបានដើរមកខាងមុខស្ថានីយ៍អ្នកដំណើរមកអន្តរជាតិ នៃអាកាសយានដ្ឋានអន្តរជាតិភ្នំពេញ ក៏ត្រូវជនសង្ស័យទាញកាំបិតបុង័តោ មកកាប់លើជនរងគ្រោះជាច្រើនកាំបិត តែត្រូវជនរងគ្រោះស្រែកឲ្យគេជួយផ្អើលដល់សន្តិសុខ ដែមយាមកាមនៅទីនោះរួមជាមួយនិងសមត្ថកិច្ចនគរបាល ស្រែកឲ្យជនសង្ស័យទម្លាក់កាំបិតចុះ ទើបជនសង្ស័យបានទម្លាក់កាំបិតចុះហើយក៏ត្រូវសមត្ថកិច្ចចាប់ខ្លួនបានភ្លាមៗតែម្តង។

បច្ចុប្បន្នជនសង្ស័យខាងលើ ត្រូវបានសមត្ថកិច្ចនាំខ្លួនមកកាន់ប៉ុស្តិ៍កាកាប ដើម្បីធ្វើការសាកសួរ និងបញ្ជូនខ្លួនបន្តមកកាន់អធិការដ្ឋាននគរបាលខណ្ឌពោធិ៍សែនជ័យ ដើម្បីឃាត់ខ្លួនបណ្តោះអាសន្ន និងកសាងសំណុំបញ្ជូនខ្លួនទៅកាន់តុលាការចាត់ការនិងផ្តន្ទាទោសតាមផ្លូវច្បាប់បន្តទៀត៕

//youtu.be/Hjx3URC_trI