ភ្នំពេញៈ យោងតាមការឲ្យដឹងពីលោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ តាមរយៈ Telegram នៅល្ងាចថ្ងៃទី១១ ខែកក្កដា ឆ្នាំ២០១៧នេះថា “លោក វង្ស ប៊ុនវិសុទ្ធ ជាព្រះរាជអាជ្ញារងបានបើកការស៊ើបសួរដោយចោទប្រកាន់លើឈ្មោះ កែវ ភារម្យ ពីបទ ប៉ុនប៉ងមនុស្សឃាត តាមមាត្រា២៧ និងមាត្រា១៩៩ ក្រមព្រហ្មទណ្ឌ ហើយបញ្ជូនទៅចៅក្រមស៊ើបសួរដើម្បីចាត់ការបន្តតាមនីតិវិធី”។

យោងតាមប្រភពពីសមត្ថកិច្ចផ្នែកព្រហ្មទណ្ឌនៃអធិការដ្ឋានខណ្ឌពោធិ៍សែនជ័យ បានឲ្យដឹងនៅល្ងាចនេះថា តុលាការនៅមិនទាន់បានចេញដីកាបង្គាប់ឲ្យនាំយកជនត្រូវចោទឈ្មោះ កែវ ភារម្យ ទៅឃុំខ្លួននៅពន្ធនាគារនៅឡើយទេរហូតមកដល់ល្ងាចថ្ងៃទី១១ ខែកក្កដា ឆ្នាំ២០១៧នេះ ដោយរង់ចាំបន្តនីតិវិធីនាព្រឹកស្អែក។

គួររំលឹកថា ជនត្រូវចោទឈ្មោះ កែវ ភារម្យ ភេទប្រុស អាយុ ២៥ឆ្នាំ មុខរបរ ជាសន្តិសុខ ក្រុមហ៊ុន រ៉ូយាល់ ខេមបូឌា លីមូស៊ិន សេកវីស ប្រចាំអាកាសយានដ្ឋានអន្តរជាតិភ្នំពេញ បច្ចុប្បន្នស្នាក់នៅផ្ទះលេខ១៨UH ផ្លូវK៤A ភូមិស្លែងរលើង សង្កាត់ទឹកថ្លា ខណ្ឌសែនសុខ ត្រូវបានសមត្ថកិច្ចឃាត់ខ្លួនកាលពីយប់ថ្ងៃទីកាលពីវេលាម៉ោង៨ និង៣០នាទីព្រឹកថ្ងៃទី៦ ខែកក្កដា ឆ្នាំ២០១៧ ស្ថិតនៅចំណុចក្នុងអាកាសយានដ្ឋានអន្តរជាតិភ្នំពេញ ក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ក្រោយពីជនត្រូវចោទបានយកកាំបិតប៉័ងតោទៅកាប់ជនរងគ្រោះឈ្មោះ កែវ សូថា ភេទប្រុស អាយុ ៥១ឆ្នាំ ដែលត្រូវគេស្គាល់ថា ជាជំនួយការផ្ទាល់របស់ លោកឧកញ៉ា អ៊ឹង ប៊ុនហ៊ូវ បណ្ដាលឱ្យរងរបួសធ្ងន់ត្រូវបញ្ជូនទៅសង្គ្រោះនៅមន្ទីរពេទ្យ៕