ភ្នំពេញ: រថយន្តកាម៉ារីឆ្លាម មួយគ្រឿង ពណ៌ស្ករ ពាក់ស្លាកលេខ ភ្នំពេញ 2M-4245 បើកបរដោយបុរសម្នាក់សង្ស័យស្រវឹង រួមដំណើរជាមួយមនុស្សស្រី៣នាក់ទៀត បើករថយន្តលឿនដូចហោះ ទៅបុកនឹងរថយន្តតាកូម៉ា ដែលមានដឹកផ្លែឈើជាច្រើននៅលើរថយន្ត យ៉ាងពេញទំហឹង បណ្ដាលឲ្យភាគីតាកូម៉ា ជ្រុលចង្កូតបន្តទៅបុកនឹងការ៉ាស់សាំងពេញទំហឹងខ្ទេចផ្នែកខាងស្ដាំទាំងស្រុង និងខ្ទាតផ្លែឈើ រាយប៉ាយពេញផ្លូវតែម្ដង។ ចំណែកឯរថយន្តកាម៉ារីឆ្លាមឯណោះ វិញរងការខូចខាតផ្នែកខាងមុខស្ទើរទាំងស្រុង។

ហេតុការណ៍នេះ បង្កឲ្យមានការភ្ញាក់ផ្អើលដល់ប្រជាពលរដ្ឋយ៉ាងខ្លាំង កាលពីវេលាម៉ោង៤និង៣០នាទី ទៀបភ្លឺថ្ងៃទី១៥ ខែកក្កដា ឆ្នាំ២០១៧ តាមបណ្ដោយផ្លូវ១៨២ កែងនិងផ្លូវ២៥៧ ស្ថិតក្នុងសង្កាត់ទឹកល្អក់២ ខណ្ឌទួលគោក រាជធានីភ្នំពេញ។

យោងតាមសម្ដីបុរសម្នាក់ដែលបើករថយន្តតាកូម៉ា ពាក់ស្លាកលេខ ភ្នំពេញ 2W-3451បានឲ្យដឹងថា មុនពេលកើតហេតុ គាត់បានដឹកផ្លែឈើចេញពីផ្សារនាគមាសទៅម្ដុំជម្ពូវ័ន្ត តាមបណ្ដោយផ្លូវ១៨២ ក្នុងទិសដៅពីកើតទៅលិច ខណ:មកដល់ចំណុចកើតហេតុ ស្រាប់តែមានរថយន្តមួយគ្រឿងម៉ាក កាម៉ារីឆ្លាម ពាក់ស្លាកលេខ ភ្នំពេញ 2M-4245 ធ្វើដំណើរតាមបណ្ដោយផ្លូវ២៥៧ ក្នុងទិសដៅពីជើងទៅត្បូង បើកបរដោយបុរសម្នាក់ លឿនដូចហោះ មកបុកចំរថយន្តរបស់គាត់ ផ្នែកខាស្ដាំពេញទំហឹង ធ្វើឲ្យរថយន្តរបស់គាត់ជ្រុលទៅបុកនឹងការ៉ាស់សាំង បណ្ដាលឲ្យស្ត្រីម្នាក់ដែលរួមដំណើរជាមួយគាត់បានរងរបួសទៀតផង។

ដោយឡែកបើយោងប្រភពព័ត៌មានពីកន្លែងកើតហេតុបានឲ្យដឹងថា មុនពេលកើ តហេតុគេបានឃើញរថយន្តមួយគ្រឿងម៉ាក កាម៉ារីឆ្លាម ពណ៌ស្ករ ពាក់ស្លាកលេខភ្នំពេញ 2M-4245 បើកបរដោយបុរសម្នាក់ សង្ស័យស្រវឹងមានមនុស្សស្រី៣នាក់ រួចដំណើរជាមួយ ក្នុងល្បឿនលឿនដូចហោះ តាមបណ្ដោយផ្លូវ២៥៧ ក្នុងទិសដៅពីជើងទៅត្បូង ខណ:មកដល់ចំណុចកើតហេតុ ក៏ទៅបុកជាមួយរថយន្តដឹកផ្លែឈើមួយគ្រឿង ម៉ាក តាកូម៉ា ពាក់ស្លាកលេខ ភ្នំពេញ 2W-3451 ដែលធ្វើដំណើរតាមបណ្ដោយផ្លូវ១៨២ ក្នុងទិសដៅពីកើតទៅលិច ធ្វើឲ្យតាកូម៉ាជ្រុលទៅបុកនឹងការ៉ាស់សាំងបន្ថែមទៀតតែម្តង។

ក្រោយកើតហេតុ រថយន្តទាំង២គ្រឿង ត្រូវបានសមត្ថកិច្ចចរាចរណ៍ជើងគោកធ្វើការវាស់វែង យកទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រង់ចាំភាគីទាំងសងខាង ចូលខ្លួនបំភ្លឺនិងសម្របសម្រួលគ្នាទៅតាមផ្លូវច្បាប់ ៕