កណ្តាលៈ សមត្ថកិច្ចល្បាតបានឃាត់ខ្លួនជនសង្ស័យ៣នាក់ និងដកហូតវត្ថុតាងគ្រឿងញៀនប្រភេទម៉ាទឹកកកចំនួន២កញ្ចប់។

ប្រតិបត្តិនេះបានធ្វើឡើងនៅវេលាម៉ោង១និង១៧នាទីរំលងអធ្រាតឈានចូលថ្ងៃទី១៧ ខែកក្កដា ឆ្នាំ២០១៧ នៅតាមបណ្តោយផ្លូវជាតិលេខ២ ត្រង់ចំណុចមុខវត្តក្រពើហារ ស្ថិតក្នុងភូមិក្រពើហារ សង្កាត់ព្រែកឫស្សី ក្រុងតាខ្មៅ ខេត្តកណ្តាល។

ជនសង្ស័យទាំង៣នាក់ ទី១ឈ្មោះ សោម ដេវីន ភេទប្រុស អាយុ១៩ឆ្នាំ ជនជាតិខ្មែរ មានទីលំនៅភូមិ កំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្តាល មុខរបរ មិនពិតប្រាកដ ទី២ឈ្មោះ អាន លីហ៊ង ភេទប្រុស អាយុ ១៧ឆ្នាំ មានទីលំនៅភូមិដើមគរ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរនៅផ្ទះ និងទី៣ឈ្មោះ ឡុង ចំណាន ភេទ ប្រុស អាយុ១៧ឆ្នាំ មានទីលំនៅភូមិព្រែកហូរកើត សង្កាត់ព្រែកហូរ ក្រុងតាខ្មៅ ខេត្តកណ្តាល មុខរបរនៅផ្ទះ។
វត្ថុតាងដកហូតរួមមាន ម្សៅក្រាមសថ្លាសង្ស័យសារធាតុញៀន ម៉ាទឹកកក២កញ្ចប់តូច និងម៉ូតូ១គ្រឿងម៉ាកហុងដាឌ្រីមស៊ីធី១០០(HONDA DRAEM City100) កូរ៉េ ពណ៌ក្រហម មានស្លាកលេខ ភ.ព1 ឌ 5115។

នៅមុនពេលកើតហេតុ កម្លាំងផ្នែកប្រឆាំងគ្រឿងញៀនក្រុងតាខ្មៅ និងកម្លាំងប៉ុស្តិ៍រដ្ឋបាលព្រែកឫស្សីកំពុងតែជិះល្បាតតាមគោលដៅក្នុងក្រុងតាខ្មៅ ពេលដែលល្បាតមកដល់ចំណុចកើតហេតុខាងលើក៏បានជួបជាមួយនឹងជនសង្ស័យទាំង៣នាក់កំពុងតែជិះម៉ូតូ ដោយមានការសង្ស័យ កម្លាំងយើងក៏បានធ្វើការឃាត់ខ្លួនសួរនាំ ហើយធ្វើការត្រួតពិនិត្យឆែកឆេរទៅលើខ្លួនជនសង្ស័យទាំង៣នាក់នោះ ក៏បានរកឃើញថ្នាំញៀនចំនួន២កញ្ចប់តូច ដែលលាក់ក្នុងកញ្ចប់បារីនៅក្នុងខ្លួនរបស់ជនសង្ស័យឈ្មោះ សោម ដេវីន តែម្តង។

តាមចម្លើយរបស់ជនសង្ស័យខាងលើសារភាពថា ចំពោះការប្រើប្រាស់ថ្នាំញៀនវិញ ជនសង្ស័យទាំង៣នាក់ធ្លាប់បានប្រើប្រាស់ថ្នាំញៀនអស់រយៈពេលជិតកន្លះឆ្នាំមកហើយ។ ក្រៅពីប្រើប្រាស់ថ្នាំញៀនជនសង្ស័យ ទាំង៣នាក់ខាងលើមិនធ្លាប់បានប្រព្រឹត្តបទល្មើស លួច ឆក់ ប្លន់ និងហិង្សាអ្វីឡើយ។

ក្រោយពេលកើតហេតុ កម្លាំងសម្ថតកិច្ចយើងក៏បាននាំខ្លួនជនសង្ស័យទាំង៣នាក់ខាងលើមកកាន់អធិការដ្ឋាននគរបាលក្រុងតាខ្មៅ ដើម្បីធ្វើការសាកសួរ និងកសាងសំណុំរឿងតាមនីតិវិធីច្បាប់៕