ភ្នំពេញ: ក្រោយពីបើកសវនាការពេញមួយថ្ងៃមិនទាន់ចប់ កាលពីទី១៣ ខែមិថុនា ឆ្នាំ២០១៧កន្លងទៅនោះ នៅព្រឹកថ្ងៃទី១៧ ខែកក្កដា ឆ្នាំ២០១៧នេះ លោកស្រី ស៊ លីនណា ចៅក្រមជំនុំជម្រះនៃសាលាដំបូងរាជធានីភ្នំពេញបានបើកសវនាការជំនុំជម្រះជាសាធារណ:លើសំណុំរឿង ជួលស្ត្រីខ្មែរពពោះជំនួសជនបរទេសនៅអូស្ត្រាលីបញ្ចប់។

ក្រោយបិទបញ្ចប់ការសាកសួរដេញដោលនាព្រឹកនេះលោកស្រីចៅក្រមជំនុំជម្រះបានសម្រេចលើកពេលទៅប្រកាសសាលក្រមនៃសំណុំរឿងនេះទៅព្រឹកថ្ងៃទី៣ ខែសីហា ឆ្នាំ២០១៧ខាងមុខ។

សូមបញ្ជាក់ថា លោក វង់ ប៊ុនវិសុទ្ធ តំណាងអយ្យការបានចោទប្រកាន់ជនជាប់ចោទទី១ឈ្មោះ CHALES TAMMY ALAYNE ភេទស្រី អាយុ៤៩ឆ្នាំ ជនជាតិអូស្ត្រាលី ទី២ឈ្មោះ ពេញ រិទ្ធី ភេទប្រុស អាយុ២៨ឆ្នាំ ជនជាតិខ្មែរ និងទី៣ឈ្មោះ សំរិទ្ធ ចាន់ចរិយា ភេទស្រី អាយុ៣០ឆ្នាំ មុខរបរឆ្មប ជាជនជាតិខ្មែរ ពីបទអន្តរការរវាងអ្នកសុំកូន និងស្ត្រីពពោះ ព្រមទាំងបទសុំឲ្យផ្ដល់ឯកសារដោយទុច្ចរិត ប្រព្រឹត្តិនៅរាជធានីភ្នំពេញ អំឡុងឆ្នាំ២០១៤ ដល់ឆ្នាំ២០១៦ យោងតាមមាត្រា៣៣២ និងមាត្រា៦៣២ នៃក្រមព្រហ្មទណ្ឌ។

នៅក្នុងសវនាការឈ្មោះ CHARLES TAMMY ALAYNE ហៅ TAMMY បានសារភាពថា ខ្លួនបានធ្វើការឲ្យក្រុមហ៊ុនNEW GENERTIC ដែលជួលស្ត្រីខ្មែរឲ្យពពោះ និងបង្កើតកូនឲ្យជនជាតិអូស្ត្រាលី។

ជនជាប់ចោទបានបន្តថា ខ្លួនបានរកស្ត្រីខ្មែរនៅលីវពពោះ និងបង្កើតកូនចំនួន២៣នាក់ ដោយនាំចេញទៅក្រៅប្រទេសបាន៦នាក់ (ស្រីទាំងអស់) ក្នុងនោះកូនភ្លោះម្នាក់ ដោយតម្លៃខ្លួនទទួលបានពីគ្រួសារចង់បានកូនម្នាក់៥០,០០០ដុល្លារអាមេរិក ដោយខ្លួនដកយក ៨០០០ដុល្លារ លុយនៅសល់ទុកចំណាយផ្សេងៗ និងឲ្យស្ត្រីពពោះ។

ជនជាប់ចោទបានអះអាងថា ការស៊ីឈ្នួលពពោះនោះមានកិច្ចសន្យាត្រឹមត្រូវជាមួយស្ត្រីអ្នកពពោះ ហើយដើម្បីបញ្ជូនកូននោះទៅអូស្ត្រាលី ឬទៅបរទេសបាន ទី១ត្រូវពិនិត្យមើល DNA រកឲ្យឃើញឪពុកសិន ទី២រៀបចំឯកសារចូលសញ្ជាតិអូស្ត្រាលី និងទី៣រៀបចំលិខិតឆ្លងដែនជាមុនសិន។

ជនជាប់ចោទឈ្មោះ សំរិទ្ធ ច័ន្ធចរិយា ហៅសម្បត្តិ បានឆ្លើយថាខ្លួនពិតជាបានធ្វើការឲ្យក្រុមហ៊ុន NEW GENERTIC មានទីតាំងនៅក្នុងអាគារ កាណាឌីយ៉ា ដែលមានឈ្មោះ Tammy ជាប្រធាន និងជាអ្នកដើររកជួលស្ត្រីឲ្យពពោះ និងបង្កើតកូនឲ្យបរទេស។ ជនជាប់ចោទនិយាយថា ខ្លួនជាអ្នកបកប្រែភាសាថែមទាំង និងពិនិត្យសុខភាពស្ត្រីស៊ីឈ្នួលពពោះ ដោយទទួលបានប្រាក់ខែចំនួន៦៥០ដុល្លារក្នុង១ខែ។
ជនជាប់ចោទ បន្ថែមថាស្ត្រីដែលស៊ីឈ្នួលពពោះពេលដាក់មេជីវិតចូលទទួលបាន៣០០ដុល្លារ នៅអំឡុងពេលពពោះទទួលបាន៤០០ដុល្លារក្នុង១ខែ និងនៅសម្រាលកូនរួចទទួលបានប្រាក់ចំនួន១ម៉ឺនដុល្លារ ក្នុងកូនមួយបន្ថែមទៀត។ ពួកគេត្រូវបានខ្លួនជូនទៅគណនីនៅធនាគារវឌ្ឍន: ដើម្បីបើកលុយពេលសម្រាលកូនរួចរាល់។

ជនជាប់ចោទឈ្មោះ ពេញ រិទ្ធិ សារភាពថា ខ្លួនជាអ្នករត់ការធ្វើសំបុត្រកំណើតឲ្យទារកម្នាក់៧០០ទៅ១៣០០ដុល្លារអាមេរិក និងជួយដឹកក្មេងចេញទៅបំពេញបែបបទនៅនាយកដ្ឋានអន្តោប្រវេសន៍ និងរត់ការធ្វើលិខិតឆ្លងដែនឲ្យទារក។

ជនជាប់ចោទបញ្ជាក់ថា ខ្លួនយកលុយពីឈ្មោះ Tammy សម្រាប់រត់ការ។ ខ្លួនជាអ្នកដើររកស្ត្រីខ្មែរឲ្យស៊ីឈ្នួលពពោះបាន៦នាក់ផងដែរ ដោយបានកម្រៃជើងសារពីស្ត្រីខ្មែរទាំងអស់នោះ ក្រៅពីកម្រៃជើងសារចំនួន៩០០ដុល្លារ ហើយខ្លួនក៏បានទទួលប្រាក់ខែចំនួន៦០០ដុល្លារក្នុងមួយខែពីឈ្មោះ Tammy ផងដែរ។

ក្រុមស្ត្រីស៊ីឈ្នួលពពោះ ដែលជាសាក្សី បានរៀបរាប់ប្រាប់អង្គសវនាការថា ពួកគាត់ព្រមពពោះដោយស្ម័គ្រចិត្តគ្មានអ្នកបង្ខំទេ។ នៅពេលសម្រាលកូនរួច កូននោះត្រូវ Tammy និងបុគ្គលិកគាត់ជាអ្នករត់ការធ្វើឯកសារផ្សេងដើម្បីឲ្យកូននោះបានទៅរស់នៅជាមួយឪពុកម្តាយ ជាម្ចាស់មេជីវិត។

គួររំលឹកថា សមត្ថកិច្ចការិយាល័យប្រឆាំងការជួញដូរមនុស្ស និងការពារអនីតិជន សហការជាមួយអធិការដ្ឋាននគរបាលខណ្ឌសែនសុខ និងខណ្ឌដូនពេញ ឃាត់ខ្លួនជនជាប់ចោទទាំង៣នាក់កាលពីល្ងាចថ្ងៃទី១៨ ខែវិច្ឆិកា ឆ្នាំ២០១៦៕