ភ្នំពេញៈ អគ្គិភ័យមួយបានលេបត្របាក់ការ៉ាសាំងមួយកន្លែង យ៉ាងសន្ធោសន្ធៅ បង្កឲ្យមានការភ្ញាក់ផ្អើលយ៉ាងខ្លាំងដល់បងប្អូនប្រជាពលរដ្ឋ រួមនិងសមត្ថកិច្ចកម្លាំងសមត្ថកិច្ចចុះមកអន្តរាគមន៍ដល់កន្លែងកើតហេតុផងដែរ។

ហេតុការណ៍នេះបានកើតឡើងកាលពីវេលាម៉ោង៨និង១៥នាទីព្រឹក ថ្ងៃទី១៨ ខែកក្កដា ឆ្នាំ២០១៧ ស្ថិតនៅតាមបណ្តោយផ្លូវ១០១៩ កែង៥៨ ស្ថិតក្នុងភូមិដីថ្មី សង្កាត់ ភ្នំពេញថ្មី ខណ្ឌសែនសុខ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យថា មុនពេលកើតហេតុ មានភ្ញៀវបានចូលមកចាក់សាំង ដាក់ក្នុងកាដុង ខណៈនោះមិនដឹងបណ្តាលមកពី អ្វីនោះទើប ស្រាប់តែមានអណ្តាតភ្លើងឆាបឆេះយ៉ាងនេះតែម្តង ហើយភ្លាមបុក្គលិកទាំងអស់បានឃើញ ក៏ប្រញាប់យកបំពង់ពន្លត់អគ្គិភ័យមកបាញ់ពន្លត់ តែមិនអាចគ្រប់គ្រងស្ថានការណ៍បាននោះទេ ទើបបណ្តាលឲ្យអគ្គិភ័យនេះឆាបឆេះយ៉ាងសន្ធោសន្ធៅបែបនេះតែម្តង។

ភ្លាមៗនោះ គេសង្កេតឃើញមានការ អន្តរាគម៍ពីសំណាក់សមត្ថកិច្ចប្រចាំមូលដ្ឋាន រួមនិងកងកម្លាំងរបស់រថយន្តពន្លត់អគ្គីភ័យស្នងការដ្ឋាននគរបាលរាជធានីភ្នំពេញ ជាច្រើនគ្រឿងបានចុះមកធ្វើការបាញ់ពន្លត់ អស់រយៈពេលប្រហែល២០នាទី ទើបអាចរលត់ទៅវិញបាន និងប្រើប្រាស់ទឹកអស់ចំនួន៤គ្រឿង ។

ក្នុងនោះដែរ អគ្គិភ័យខាងលើ បានលេបត្របាក់ សម្ភារៈមួយចំនួនធំ ដូចជា ម៉ូតូចំនួន៣គ្រឿង ម៉ូតូសណ្តោងរម៉ក១គ្រឿង កន្លែងវេប្រាក់ ដកប្រាក់មួយ និងទូសម្រាប់ចាក់ចំនួន២ រួមនិងសម្ភារៈជាច្រើនទៀត តែមិនបណ្តាលឲ្យនរណាម្នាក់រងរបួសអ្វីនោះឡើយ៕

https://youtu.be/5iRRWJOerUA