ភ្នំពេញ: ប្រភពពីលោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ បានបញ្ជាក់ប្រាប់ក្រុមអ្នកសារព័ត៌មានតាម Telegram នៅល្ងាចថ្ងៃទី២៦ ខែកក្កដា ឆ្នាំ២០១៧ថា លោក លី សុខលេង ជាចៅក្រមស៊ើបសួរបានសម្រេចឃុំខ្លួនបណ្តោះអាសន្នលើជនត្រូវចោទជនជាតិ កូសូវ៉ូ ដោយចោទប្រកាន់ពីបទ ឆបោក និងសមគំនិតក្នុងអំពើមិនបំពេញកាតព្វកិច្ចចំពោះឧបករណ៍អាចជួញដូរបាន(ការចេញមូលប្បទានប័ត្រគ្មានសាច់ប្រាក់) ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០១៦ ថ្ងៃទី២៨ ខែមេសា ថ្ងៃទី១៦ ខែឧសភា ថ្ងៃទី២៦ ខែឧសភា និង១២ មិថុនា ឆ្នាំ២០១៧ តាមមាត្រា ២៩ មាត្រា ៣៧៧ មាត្រា៣៧៨ នៃក្រមព្រហ្មទណ្ឌ និងមាត្រា២៣១ នៃច្បាប់ស្តីពីឧបករណ៍អាចជួញដូរបាន និងប្រតិបត្តិការទូទាត់សងប្រាក់។

បើយោងតាមប្រភពពីសមត្ថកិច្ចបានឲ្យដឹងថា ជនសង្ស័យឈ្មោះ DENIS COKOVIC ហៅ DENIS DENY ភេទប្រុស អាយុ ៥៤ឆ្នាំ ជនជាតិ កូសូវ៉ូ ត្រូវបានសមត្ថកិច្ចកងរាជអាវុធហត្ថលើផ្ទៃប្រទេស ឃាត់ខ្លួនកាលពីកាលពីថ្ងៃទី២១ ខែកក្កដា ឆ្នាំ២០១៧នៅរាជធានីភ្នំពេញ តាមបណ្ដឹងរបស់លោកជំទាវ ឃឹម រ៉ានី អគ្គនាយិកាទូរទស្សន៍អាស៊ីអាគ្នេយ៍ ជាភរិយារបស់ឯកឧត្តម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី និងជាសាកលវិទ្យាធិការ សាកលវិទ្យាល័យកម្ពុជា។

នៅក្នុងបណ្ដឹងនោះ បានបញ្ជាក់ថា ជនសង្ស័យបាន ឆបោកប្រាក់ពីដើមបណ្ដឹងប្រមាណជា ២៧លានដុល្លារ ពាក់ព័ន្ធគម្រោងសាងសង់ រីហ្សត នៅក្នុងខេត្តកែប និងកំពត៕

//youtu.be/Ubgpuk3rehs