ឧត្តរមានជ័យ: គ្រោះថ្នាក់ចរាចរណ៍ ម៉ូតូមួយគ្រឿងមិនដឹងជាចងកំហឹងមកពីណា បានបើកមកបំបុកនឹងគោយន្តកន្ត្រៃ ចតស្ងៀម ពេញទំហឹង បណ្តាលឲ្យស្លាប់មនុស្ស២នាក់ (ប្រុស១ ស្រី១ )។ ហេតុការណ៍នេះ បានកើតឡើង នៅវេលាម៉ោង១២និង៣០នាទី ថ្ងៃទី២៦ ខែឧសភា ឆ្នាំ២០១៦ នៅចំណុចផ្លូវជាតិលេខ៦៨ ស្ថិតក្នុងភូមិថ្មី សង្កាត់កូនក្រៀល ក្រុងសំរោង ខេត្តឧត្តរមានជ័យ។
តាមសាក្សី បានឲ្យដឹងថា អ្នកបើកម៉ូតូបង្កឈ្មោះ ដៀប ឃុនស័ក្ត ភេទប្រុស អាយុ១៨ឆ្នាំ រស់នៅភូមិកាប់គោ សង្កាត់អូរចារ ក្រុងនិងខេត្តបាត់ដំបង មុខរបរជាទាហានកងរថក្រោះលេខ៦៥ ឈរជើងភូមិផ្អុង សង្កាត់កូនក្រៀល ក្រុងសំរោង បានបើកបរម៉ូតូ ម៉ាកហុងដាឌ្រឹម ពណ៌ខ្មៅ សេរី១២៥ឆ្នាំ២០១៦ ពាក់ស្លាកលេខ ឧត្តរមានជ័យ ១C-៤៨១៣ បើកបរពីត្បូងទៅជើង មកបុកគោយន្តកន្ត្រៃដែលឈប់ចតស្ងៀម (បណ្តាលឲ្យស្លាប់ នៅពេលបញ្ជូនទៅសង្គ្រោះនៅមន្ទីរពេទ្យ)។ អ្នករួមដំណើរ ជាមួយឈ្មោះ វេត សានាង ភេទស្រី អាយុ៤៨ឆ្នាំ រស់នៅភូមិសំរោង ស្រុករលៀផ្អៀរ ខេត្តកំពង់ឆ្នាំង(ស្លាប់ភ្លាមៗកន្លែងកើតហេតុ)។ម្ចាស់គោយន្តកន្ត្រៃ ឈ្មោះ គក់ ស្រស់ ភេទប្រុស អាយុ១៧ឆ្នាំ រស់នៅភូមិថ្មី សង្កាត់ កើតហេតុខាងលើ។
ក្រោយកើតហេតុកម្លាំងប៉ូលិសប៉ុស្តិ៍ បានចុះទៅដល់កន្លែងកើតហេតុ ធ្វើការវាស់វែងនិងដកហូតវត្ថុតាង និងនាំខ្លួនម្ចាស់គោយន្តកន្ត្រៃ មកកាន់អធិការដ្ឋានក្រុងដោះស្រាយតាមនីតិវិធីច្បាប់៕
មតិយោបល់