ភ្នំពេញៈ បុរសម្នាក់អ្នករត់ម៉ូតូកងបី មួយគ្រឿង រងរបួសធ្ងន់ធ្ងរ ត្រូវបានបញ្ជូនទៅមន្ទីពេទ្យភ្លាមៗ ខណៈដែល ធ្វើដំណើរតាមផ្លូវ ត្រូវរថយន្តព្រុស រត់តាក់ស៊ីបើកទៅបុកពីក្រោយពេញទំហឹង បណ្តាលឲ្យម៉ូតូកងបី ក្រឡាប់ផ្ងារជើងម្ខាង បានរងការខូចខាត ចំណែករថយន្តព្រុស បើកគេចខ្លួនបាត់ស្រមោលពីកន្លែងកើតហេតុតែម្តង។

ហេតុការណ៍នេះបានកើតឡើងកាលពីវេលាម៉ោង២និង៣០នាទីយប់ ថ្ងៃទី៣០ ខែកក្កដា ឆ្នាំ២០១៧ តាមបណ្តោយមហាវិថី ព្រះមុនីវង្ស ម្តុំវិទ្យាល័យបឹងត្របែក ស្ថិតក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញ បុរសម្នាក់ ជិះម៉ូតូកងបីមួយគ្រឿង គ្មានស្លាកលេខ ធ្វើដំណើរតាមបណ្តោយមហាវិថីព្រះមុនីវង្ស ក្នុងទិសដៅពីជើងទៅត្បូង ខណៈដែលធ្វើដំណើរមកដល់កន្លែងកើតហេតុខាងលើ ម្តុំវិទ្យាល័យបឹងត្របែក ក៏មានរថយន្តរត់តាក់ស៊ីមួយគ្រឿងម៉ាក ព្រុស ពណ៌ក្រហម មិនចាំស្លាកលេខ បើកក្នុងល្បឿនយ៉ាងលឿន ស្របទិសគ្នា ជាមួយម៉ូតូកងបីខាងលើ បានបើកទៅបុកម៉ូតូកងបី ពីក្រោយពេញទំហឹង បណ្តាលឲ្យបុរសដែលជាអ្នកជិះម៉ូតូកងបីខាងលើ បានរងរបួសធ្ងន់ធ្ងរ ត្រូវបានបញ្ជូនទៅមន្ទីពេទ្យភ្លាមៗ ចំណែកម៉ូតូកងបី បានក្រឡាប់ផ្ងារជើងម្ខាង រងការខូចខាត រីឯអ្នកបើកបររថយន្ត បានបើករថយន្តរត់គេចខ្លួនបាត់ស្រមោលពីកន្លែងកើតហេតុបន្សាល់ទុកតែបុរសរងគ្រោះ និងម៉ូតូកងបីតែប៉ុណ្ណោះ ។

ក្រោយពេលកើតហេតុ បុរសរងគ្រោះខាងលើ បានទៅសំរាកព្យាបាលនៅឯមន្ទីរពេទ្យ ចំណែកម៉ូតូកងបីខាងលើ សមត្ថកិច្ចបានប្រគល់ជូនក្រុមគ្រួសារបុរសរងគ្រោះ៕