ភ្នំពេញៈ រថយន្តហាយឡែនឌ័រ​ បើកបរដោយបុរសម្នាក់ ក្នុងល្បឿនលឿនល្មម ខណៈមកដល់ចំណុចផ្លូវបែកជាបួន វាក់អឺជាមួយរថយន្តឡិចស៊ីស ដែលកំពុងបើកបរដោយបុរសជនជាតិចិនក្នុងល្បឿនលឿន ដែលធ្វើដំណើរក្នុងទិសដៅខុសគ្នា បុកគ្នាយ៉ាងពេញទំហឹង បណ្ដាលឲ្យរថយន្តទាំង២គ្រឿង រងការខូចខាតយ៉ាងដំណំ តែសំណាងល្អមិនមានអ្នករងរបួស។

ហេតុការណ៍នេះបានកើតឡើងកាលពីវេលាម៉ោង១និង២០នាទី រំលងអធ្រាត្រឈានចូលថ្ងៃទី១០ ខែសីហា ឆ្នាំ២០១៧ តាមបណ្ដោយផ្លូវ១០១១ កែងនឹងផ្លូវ១៩៦៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តមួយគ្រឿងម៉ាកហាយឡែនឌ័រ ពណ៌ទឹកប៊ិច ពាក់ស្លាកលេខ ភ្នំពេញ 2AP-8605 បើកបរដោយបុរសម្នាក់តាមបណ្ដោយផ្លូវ១៩៦៦ ក្នុងទិសដៅពីកើតទៅលិច ខណៈមកដល់ចំណុចផ្លូវបែកជាបួន ក៏បានបុកគ្នាយ៉ាងពេញទំហឹងជាមួយរថយន្តឡិចស៊ីស ពណ៌ស្ករ ពាក់ស្លាកលេខ ភ្នំពេញ 2AD-7338 ដែលបើកបរដោយបុរសជនជាតិចិនក្នុងល្បឿនលឿន ធ្វើដំណើរតាមបណ្ដោយផ្លូវ១០១១ ក្នុងទិសដៅពីត្បូងទៅជើង បណ្ដាលឲ្យរថយន្តឡិចស៊ីស រងការខូចខាតផ្នែកខាងស្ដាំ រីឯរថយន្តហាយឡែនឌ័រ រងការខូចខាតផ្នែកខាងមុខ។

ក្រោយកើតហេតុភាគីទាំងសងខាងដោះស្រាយគ្នាមិនត្រូវប្រញាល់ឲ្យសមត្ថកិច្ចជំនាញចរាចរណ៍ជើងគោកធ្វើការវាស់វែងយករថយន្តទាំង២ទៅរក្សារទុកនៅអធិការដ្ឋាននគរបាលខណ្ឌសែនសុខរងចាំដោះស្រាយគ្នាបន្តទៀត៕