Alvaro Morata បានបង្ហាញខ្លួនប៉ុន្មានប្រកួតហើយឲ្យក្រុមតោខៀវ Chelsea ដោយខ្សែប្រយុទ្ធអេស្ប៉ាញរូបនេះ មិនទាន់រកគ្រាប់បាល់ ១គ្រាប់ឲ្យក្លិបថ្មីឡើយ។

ថ្វីបើលេង ក្នុងឈុតបម្រុងរបស់ក្រុមតោខៀវ Chelsea ក្តី តែខ្សែប្រយុទ្ធដែលទើបនាំយកពីក្រុម Real Madrid កីឡាករ Alvaro Morata មិនទាន់បង្ហាញខ្លួនយ៉ាងល្អនៅឡើយទេ។ បើប្រៀបធៀប ជាមួយនឹងខ្សែប្រយុទ្ធ នាំចូលថ្មីៗ របស់ក្លិបធំៗ នៅអង់គ្លេស ដូចជា Romelu Lukaku របស់បីសាចក្រហម Manchester United និង Alexandre Lacazette របស់ក្រុមកាំភ្លើងធំ Arsenal សុទ្ធសឹងតែរកគ្រាប់បាល់ឲ្យក្រុមបានហើយ នៅឡើយ តែ Morata ប៉ុណ្ណោះ។

តាមរយៈ ការយឺតយ៉ាវ ក្នុងការរកគ្រាប់បាល់នេះ ត្រូវបាន Sky Sports លើកឡើងថា តើ Alvaro Morata លេងមិនទាន់ត្រូវជើង ឬក៍នៅ Premier League មិនស្រួលដូចនៅ Laliga? យ៉ាងណាវិញ ប្រភពដដែល ក៍បានបន្ថែមទៀតថា ឆ្លងកាត់ ការប្រកួតកន្លងមកនេះ ជាពិសេស ការប្រកួតដណ្តើមពាន Community Shield ជាក្រុមកាំភ្លើងធំ Arsenal ក្រុម Chelsea នៅតែមិនទាន់ដាក់ Morata ឲ្យលេងក្នុងឈុត ១១នាក់ដំបូងនៅឡើយទេ រហូតដល់ជិតពាក់កណ្តាលតង់ទី២ ទើបដាក់ចូលលេង។

គួរបញ្ជាក់ផងដែរថា Alvaro Morata សម្រេចចិត្តចាកចេញពីក្រុមយក្សអេស្ប៉ាញ Real Madrid គឺមានបំណងចង់ចៀសឲ្យផុត ពីកៅអីបម្រុង ខណៈការផ្លាស់មកកាន់ ក្រុម Chelsea ប៉ុន្មានប្រកួតកន្លងមកនេះ ខ្សែប្រយុទ្ធដ៍ឆ្នើមរូបនេះ នៅតែអង្គុយក្នុងកៅអីបម្រុងដដែល។ ដូច្នេះហើយ រង់ចាំមើលថា តើការប្រកួត Premier League ចុងសប្តាហ៍នេះ ខ្សែប្រយុទ្ធចំណូលថ្មី Alvaro Morata បន្តអង្គុយ ក្នុងកៅអីបម្រុង ឬយ៉ាងណា?