ភ្នំពេញៈ បុរសម្នាក់បេីករថយន្តម៉ាក ហាយឡែនឌ័រមួយគ្រឿង សង្ស័យស្រវឹង បានបេីកយ៉ាងលឿនទៅបុកគ្នាជាមួយរម៉កកង់បីយ៉ាងពេញទំហឹង បណ្តាលឲ្យភាគីខាងរម៉កកង់បីក្រឡាប់ ធ្លាក់មនុស្ស៤នាក់បោកទៅនឹងថ្នល់ រងរបួសធ្ងន់និងស្រាល ត្រូវបានរថយន្តសាម៉ុយបញ្ជូនទៅមន្ទីរពេទ្យភ្លាមៗ ។

ហេតុការណ៍នេះបង្កឲ្យមានការភ្ញាក់ផ្អេីលកាលពីវេលាម៉ោង ៩ និង ១០នាទីយប់ ថ្ងៃទី២០ ខែ សីហា ឆ្នាំ ២០១៧ តាមបណ្តោយផ្លូវលេខ ៤៧ សង្កាត់ស្រះចក ខណ្ឌទួលគោក រាជធានីភ្នំពេញ។

យោងតាមប្រភពព័ត៌មានកន្លែងកេីតហេតុបានឲ្យដឹងថា មុនពេលកេីតហេតុគេបានឃេីញបុរសម្នាក់សង្ស័យស្រវឹង បានបេីកបររថយន្តម៉ាក ហាយឡែនឌ័រមួយគ្រឿង ពណ៌ទឹកប្រាក់ ពាក់ស្លាកលេខ ភ្នំពេញ 2AD-3164 បេីកតាម បណ្តោយផ្លូវ ៤៧ ក្នុងទិសដៅពីត្បូង ទៅជេីងខណៈមកដល់ចំណុចកេីតហេតុ ក៏ជ្រុលចង្កូតជាន់ហ្វ្រាំងមិនទាន់ក៏ទៅបុកគ្នាជាមួយរម៉កកង់បី ពាក់ស្លាកលេខ ភ្នំពេញ 1AS-9779 ជិះក្នុងទិសដៅបញ្ច្រាសគ្នា ពីជេីងទៅត្បូងពេញទំហឹង បណ្តាលឲ្យ រឺម៉កកង់បីក្រឡាប់ហេីយអ្នកដំណេីរនៅលេីរម៉កមានបុរស២នាក់ និង ស្រ្តី២នាក់ ធ្លាក់ពីលេីរម៉កបោកទៅនឹងថ្នល់ រងរបួសធ្ងន់ស្រាល ត្រូវរថយន្តសាម៉ុយបញ្ជូនទៅមន្ទីរពេទ្យភ្លាមៗ។ រីឯអ្នកបេីករឺុម៉កកង់បីសំណាងល្អ លោតចេញទាន់មិនមានរបួសនោះទេ ។ចំណែកអ្នកបេីករថយន្តត្រូវបានសមត្ថកិច្ចឃាត់សាកសួរនាំនៅប៉ុស្តិ៍ស្រះចក រថយន្តរងការខូចខាតកំណាត់មុខផ្នែកខាងឆ្វេង។

ក្រោយពេលកើតហេតុ សមត្ថកិច្ចជំនាញចរាចរណ៍ បានចុះមកធ្វេីការវាស់វែងយករថយន្ដនិងរម៉កកង់បីទាំង២គ្រឿង ទៅរក្សាទុកនៅអធិការដ្ឋានគរបាលខណ្ឌ ដូនពេញ ដេីម្បីដោះស្រាយគ្នានៅពេលក្រោយតាមច្បាប់បន្តទៀត ៕