ភ្នំពេញៈ កម្លាំងសមត្ថកិច្ចនៃអធិការដ្ឋាននគរបាលខណ្ឌព្រែកព្នៅ បានធ្វើការឃាត់ខ្លួនជនសង្ស័យម្នាក់ជាក់ស្តែង ព្រមទាំងដកហូតថ្នាំញៀនចំនួន ៥ហ៊ុន កាលពីវេលាម៉ោង១០និង៤៥នាទី ថ្ងៃទី២៦ ខែសីហា ឆ្នាំ២០១៧ ដែលស្ថិតនៅចំណុចផ្លូវលេខ១៥១ ភូមិព្រែកព្នៅ សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។

ជនសង្ស័យខាងលើមានឈ្មោះ អ៊ុន ចាន់នី ហៅនី ភេទប្រុស អាយុ ២៣ឆ្នាំ មុខរបរ មិនពិតប្រាកដ (ជួញដូរ និងចែកចាយគ្រៀងញៀន) ស្នាក់នៅភូមិពោធរ៉ា ឃុំភ្នំបាទ ស្រុកពញាឮ ខេត្តកណ្តាល។

សមត្ថកិច្ចបានប្រាប់ឲ្យដឹងថា នៅមុនពេលឃាត់ខ្លួនជនសង្ស័យខាងលើ កម្លាំងសមត្ថកិច្ចខណ្ឌ និងប៉ុស្តិ៍ព្រែកព្នៅ បានធ្វើការជិះល្បាតក្នុងមូលដ្ឋាន ខណៈពេលកំពុងតែជិះល្បាត ស្រាប់តែប្រទះឃើញជនសង្ស័យម្នាក់ ជិះម៉ូតូ មួយគ្រឿង ម៉ាក ហុងដាឌ្រីសង់ សេរីឆ្នាំ២០១៤ ពាក់ស្លាកលេខ ភ្នំពេញ 1CI-6197 ដោយមានការសង្ស័យ ទើបកម្លាំងសមត្ថកិច្ចយើងបានឃាត់ខ្លួនសួរនាំ និងឆែកឆេររកឃើញថ្នាំញៀនចំនួន ៥ហ៊ុន ជាប្រភេទ ម៉ាទឹកកក។ ក្រោយមក កម្លាំងសមត្ថកិច្ចយើងបានឃាត់ខ្លួនយកមកប៉ុស្តិ៍នគរបាលព្រែកព្នៅ ដើម្បីធ្វើការសាកសួរ។

ក្រោយពីសាកសួរជនសង្ស័យខាងលើរួចមក រូបគេបានសារភាពថា ខ្លួនបានទៅទិញថ្នាំញៀននោះនៅក្នុងសង្កាត់ស្វាយប៉ាក ខណ្ឌឫស្សីកែវ ដោយទិញក្នុងមួយកញ្ចប់នេះចំនួន ៥ហ៊ុន ក្នុងតម្លៃ ៥០ដុល្លារ ដើម្បីយកទៅចែកចាយបន្ត។

បច្ចុប្បន្នជនសង្ស័យខាងលើ រួមនិងវត្ថុតាង ត្រូវសមត្ថកិច្ចឃាត់ខ្លួនជាបណ្តោះអាសន្ននៅអធិការដ្ឋាននគរបាលខណ្ឌព្រែកព្នៅ ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការបន្តតាមនីតិវិធីច្បាប់។

គួររំលឹកថា បញ្ហាគ្រឿងញៀននៅក្នុងខណ្ឌឫស្សីកែវនេះ គេសង្កេតឃើញថា សមត្ថកិច្ចខណ្ឌឫស្សីកែវ តែងតែបង្ក្រាបគ្រឿងញៀនជារៀងរាល់ថ្ងៃយប់ តែមិនដែលឃើញបង្ក្រាបបានឈ្មួញធំៗនោះឡើយ តែបែរជាទៅបង្ក្រាបអ្នកជួញដូរ និងចែកចាយគ្រឿងញៀនតូចតាចទៅវិញ៕