កណ្តាលៈ នៅរសៀលថ្ងៃទី២៨ ខែសីហា ឆ្នាំ២០១៧ កម្លាំងគណៈកម្មការប្រយុទ្ធប្រឆាំងផលិតផលក្លែងក្លាយបានបញ្ជូនស្ត្រីលក់ឡេ និងគ្រឿងលម្អរខ្លួនតាម Online មកតុលាការហើយដើម្បីបន្តរនីតិវិធីតាមផ្លូវច្បាប់។

បច្ចុប្បន្នស្ត្រីលក់ឡេ និងគ្រឿងលម្អរខ្លួនតាម Online កំពុងស្ថិតក្រោមការសាកសួររបស់តំណាងអយ្យការ។

សូមរំលឹកថា៖ នៅថ្ងៃទី២៦ ខែសីហា ឆ្នាំ២០១៧ កម្លាំងចម្រុះរបស់គណៈកម្មការប្រយុទ្ធប្រឆាំងផលិតផលក្លែងក្លាយដែលមានហានិភយ័ខ្ពស់ដល់សុខភាពនិងសុវត្ថិភាពសង្គម ដឹកនាំដោយឧត្តមសេនីយ៍ត្រី ទូច យុទ្ធា អនុលេខាធិការដ្ឋានគណៈកម្មការប្រយុទ្ធប្រឆាំងផលិតផលក្លែងក្លាយដែលមានហានិភ័យខ្ពស់ដល់សុខភាពនិងសុវត្ថិភាពសង្គម ដែលមានការសម្របសម្រួលពីលោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកណ្តាល និងមានការចូលរួមពីការិយាលយ័ប្រឆាំងបទល្មើសសេដ្ឋកិច្ចនៃស្នងការនគរបាលខេត្តកណ្តាល មន្ទីរសុខាភិបាលខេត្តកណ្តាល លោកអធិការក្រុងតាខ្មៅ លោកមេប៉ុស្តិ៍ បានចុះធ្វើការឆែកឆេរផ្ទះស្ត្រីម្នាក់ លក់ឡេ លក់ម្សៅ គ្រឿងលម្អរខ្លួន សង្ស័យផលិត វេចខ្ចប់ រក្សាទុក លក់ និងចែកចាយថ្នាំលាបស្បែក លាបឡេ ដោយពុំមានសុំច្បាប់អនុញ្ញាត និងចុះបញ្ជីការជាមួយក្រសួងសុខាភិបាលហើយផលិតផល ជាថ្នាំលាបស្បែកនេះសង្សយ័ថា ជាផលិតផលក្លែងក្លាយ ដែលបង្កគ្រោះថ្នាក់ និងហានិភ័យខ្ពស់ ដល់សុខភាព និងសុវត្ថិភាពអ្នកប្រើប្រាស់។

ហេតុការណ៍ចុះឆែកឆេរនេះកាលពីវេលាម៉ោង១០ព្រឹកថ្ងៃទី២៦ ខែសីហា ឆ្នាំ២០១៧ នៅចំណុចផ្ទះយីហោរ ៩៩៩ វុទ្ធ ថេត កាត់ដេរ ស្ថិតនៅភូមិព្រែកតាពៅ សង្កាត់ដើមមាន ក្រុងតាខ្មៅ ខេត្តកណ្តាល។ ម្ចាស់ទីតាំងមានឈ្មោះឆេង ស្រីរត្ន័ ហៅ (Love Riya) ភេទស្រី អាយុ៣២ឆ្នាំ មានទីលំនៅភូមិព្រែកតាពៅ សង្កាត់ដើមមាន ក្រុងតាខ្មៅ ខេត្តកណ្តាល មានមុខរបរផលិតករ និងអាជីវករថ្នាំលាបស្បែក។

វត្ថុតាងចាប់យកបាន មានប្រភេទឡេលាបស្បែកឲ្យស ក្នុងរយៈពេលមួយសប្តាហ៍ ម្សៅលាបមុខឲ្យស បំបាត់មុន ជាំ ឡេ និងម្សៅខាត់ស្បែកឲ្យសភ្លាមៗ។ល។ សរុបទាំងអស់៣០ប្រភេទ មួយចំនួនធំ។

បើតាមឧត្តមសេនីយ៍ត្រី ទូច យុទ្ធា អនុលេខាធិការដ្ឋានគណ:គណកម្មការប្រយុទ្ធប្រឆាំងផលិតផលក្លែងក្លាយដែលមានហានិភ័យខ្ពស់ដល់សុខភាពនិងសុវត្ថិភាពសង្គមបានប្រាប់ Post News ថា ដោយមានការទទួលព័ត៌មាន និងការផ្សាយតាម Online របស់ម្ចាស់ផលិតផល គណ:កម្មការយើងបានធ្វើការស្រាវជ្រាវ រហូតមានការឯកភាពពីស្ថាប័នតុលាការ គណ:កម្មការយើងបានសហការជាមួយព្រះរាជអាជ្ញារង បានចុះឆែកឆេរទីតាំងខាងលើ ដែលសសង្ស័យលក់ឡេ លក់ម្សៅ គ្រឿងលម្អខ្លួន ក្លែងក្លាយ។ ភ្លាមៗនោះបន្ទាប់ពីធ្វើការឆែកឆេរពិតជាបានរកឃើញថា សង្ស័យផលិត វេចខ្ចប់ រក្សាទុក លក់ និងចែកចាយថ្នាំលាបស្បែក លាបឡេ ដោយពុំមានសុំច្បាប់អនុញ្ញាត និងចុះបញ្ជីការជាមួយក្រសួងសុខាភិបាលហើយផលិតផល ជាថ្នាំលាបស្បែកនេះសង្ស័យថា ជាផលិតផលក្លែងក្លាយ ដែលបង្កគ្រោះថ្នាក់ និងហានិភ័យខ្ពស់ ដល់សុខភាព និងសុវត្ថិភាពអ្នកប្រើប្រាស់។

លោកឧត្តមសេនីយ៍ត្រីបានប្រាប់ឲ្យដឹងទៀតថា ចំពោះផលិតផលទាំងអស់នោះ លោកព្រះរាជអាជ្ញាររងបានឯកភាពឲ្យខាងគណ:កម្មការប្រយុទ្ធប្រឆាំងផលិតផលក្លែងក្លាយយកទៅមន្ទីរពិសោធន៍ ដើម្បីពិសោធន៍មើលឲ្យដឹងច្បាស់ថាផលិតផលទាំងអស់នោះជាផលិតផលក្លែងក្លាយ និងពេលប្រើប្រាស់រួចអាចប៉ះពាល់ដល់សុខភាពកម្រិតណា។ ចំពោះឯម្ចាស់ទីតាំងក៏ត្រូវបានឃាត់ខ្លួន និងបន្តនីតិវិធីទៅតាមផ្លូវច្បាប់៕