ភ្នំពេញៈ តាមសេចក្តីរាយការណ៍ពីភ្នាក់ងារ Post News បានឲ្យដឹងថា ខណៈនេះកម្លាំងនគរបាលខណ្ឌពោធិ៍សែនជ័យ បានដឹកនាំកម្លាំងជាច្រើននាក់ ធ្វើការដេញតាមចាប់មុខសញ្ញាក្រុមចោរដែលធ្វើសកម្មភាពកាប់សម្លាប់បុរសម្នាក់ ប្លន់យកម៉ូតូបានសម្រេចកាលពីយប់មិញ ហើយព្យាយាមរត់គេចខ្លួនរហូតមកដល់ចំណុចលាក់ខ្លួនរបស់ជនសង្ស័យ និងកំពុងតែឡោមពទ្ធ័ដើម្បីចូលទៅឆ្មក់បង្ក្រាបនិងចាប់ខ្លួនពួកគេផងដែរ។

ហេតុការណ៍នេះបានកើតឡើងតាំងពីម៉ោង១២យប់ រហូតមកទល់នឹងម៉ោង៦និង៣០នាទីព្រឹកថ្ងៃទី២៩ ខែសីហា ឆ្នាំ២០១៧ នេះ ស្ថិតនៅក្នុងភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ហើយប្រតិបត្តិការនេះ នៅមិនទាន់ចប់នៅឡើយនោះទេ សមត្ថកិច្ចកំពុងតែបន្តឡោមពទ្ធ័ចាប់ជនសង្ស័យខាងលើនៅឡើយ។

ចំពោះក្រុមជនសង្ស័យខាងលើនេះ គឺត្រូវបានសមត្ថកិច្ចបង្ហើបឲ្យដឹងថា ជាមុខសញ្ញាក្រុមជនសង្ស័យ ដែលធ្វើសកម្មភាពកាប់សម្លាប់បុរសម្នាក់ ប្លន់យកម៉ូតូបានសម្រេចកាលពីយប់មិញ ហើយពេលនេះសមត្ថកិច្ចចាប់បានជនសង្ស័យចំនួន៣នាក់ហើយ និងកំពុងតែបន្តចាប់ជនសង្ស័យបន្តទៀត។

ព័ត៌មានលម្អិត Post News នឹងផ្សាយជូនបន្តទៀត៕