ក្រោយពីការតាមប្រមាញ់ ជាច្រើនសប្តាហ៍កន្លងមក ក្រុម Barcelona បាននាំយកខ្សែប្រយុទ្ធវ័យក្មេងបារាំង Ousmane Dembele មកជំនួស Neymar បានហើយ។

បើតាមការចុះផ្សាយរបស់ Sky Sports បានឲ្យដឹងថា ក្រុម Barcelona បានចុះកុងត្រានាំយកកីឡាករ Ousmane Dembele ពីក្រុម Dortmund ក្នុងតម្លៃ ១៣៥,៥ លានផោន។ ប្រភពដដែលបានឲ្យដឹងបន្ថែមទៀតថា Dembele បានចុះកុងត្រារយៈពេល ៥ឆ្នាំជាមួយ Barcelona ក្នុងតម្លៃផ្ទេរលំដាប់ទី២ ពិភពលោក បន្ទាប់ពី Neymar ។ ក្នុងនោះដែរ Barcelona បានដាក់ Release Clause របស់ Dembele រហូតដល់ទៅ ៤០០លានអឺរ៉ូ ដែលខ្ពស់ជាង Luis Suarez និង Lionel Messi ដែលមានតម្លៃ Release Clause ត្រឹម ៣០០លានអឺរ៉ូប៉ុណ្ណោះ។ ទាក់ទងនឹងការផ្លាស់ ជាផ្លូវការណ៍ មកាន់ក្រុម Barcelona នេះដែរ ខ្សែប្រយុទ្ធវ័យ ២០ឆ្នាំរូបនេះ បាននិយាយថា រូបគេពិតជាសប្បាយចិត្តខ្លាំងណាស់ ដែលបានផ្លាស់មកកាន់ក្រុម កំពូលបែបនេះ។

ម្យ៉ាងវិញទៀត កីឡាកររូបនេះ នឹងចូលរួមជួយក្រុម Barcelona ឲ្យកាន់តែខ្លាំង ជាងមុន ខណៈដែលរូបគេត្រូវជំនួសតំណែងរបស់ Neymar ផងដែរនោះ។ នៅចុងសប្តាហ៍នេះទំនងជា Dembele អាចបង្ហាញខ្លួនលើកដំបូងឲ្យក្រុម Barcelona ក្នុងការប្រកួតជាមួយក្រុម Espanyol ។