ពោធិ៍សាត់ៈ លោកអធិការស្រុកបាកាន បានប្រាប់ Post News ថា មានករណីគ្រោះថា្នក់ចរាចរណ៍ មួយបានកើតឡើង ម៉ូតូបុកជាមួយកង់ បណ្តាលឲ្យក្មេងស្រីម្នាក់ ស្លាប់ពេលបញ្ជូនមន្ទីរពេទ្យ។
ហេតុការណ៍នេះបានកើតឡើងនៅវេលាម៉ោង១០ និង៣០នាទី ថ្ងៃទី៣១ ខែសីហា ឆ្នាំ២០១៧ នៅលើផ្លូវលំគ្រួសក្រហម ស្ថិតនៅក្នុងភូមិអណ្តូងសំបូរ ឃុំស្នាមព្រះ ខេត្តពោធិ៍សាត់។

តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេមានម៉ូតូ១គ្រឿង ម៉ាកហុងដា សេ១២៥ ពណ៌ខ្មៅ ស៊េរី២០១៣ ពាក់ស្លាកលេខ ភ្នំពេញ1B-4246 ជិះពីជើងទៅត្បូង ដោយឈ្មោះ កង ភារៈ ភេទប្រុស អាយុ២២ឆ្នាំ ស្នាក់នៅភូមិឃុំកើតហេតុ លុះមកដល់ចំណុចខាងលើបានបុកមនុស្សជិះកង់ធ្វើដំណើរបញ្ច្រាសទិសគ្នា ជិះដោយឈ្មោះ ពេង ដាលីន ភេទស្រី អាយុ១៣ឆ្នាំ របួសបាក់ភ្លៅខាងឆ្វេង សាច់លើចិញ្ចើមធ្វេងប្រវែងប្រហែល៦ សង់ទីម៉ែត្រ រងរបួសធ្ងន់។ ជនរងគ្រោះបានបញ្ជូនទៅមន្ទីរពេទ្យខេត្តពោធិ៍សាត់ ហើយបានស្លាប់។

ក្រោយពេលកើតហេតុ សមត្ថកិច្ចចុះទៅដល់កន្លែងកើតហេតុ ធ្វើកំណត់ហេតុ និងនាំយកកង់នឹងម៉ូតូ មករក្សាទុកនៅប៉ុស្តិ៍ រង់ចាំការដោះស្រាយគ្នាពេលក្រោយ៕