បាត់ដំបងៈ លោកអធិការរងស្រុកមោងឫស្សី បានប្រាប់ Post News ថា នៅវេលាម៉ោង ០៦ និង៤០នាទីល្ងាចថ្ងៃទី០២ ខែកញ្ញា ឆ្នាំ២០១៧ មានករណីគ្រោះថ្នាក់ចរាចរណ៍មួយ រវាងម៉ូតូមួយគ្រឿង ប៉ះគ្នាជាមួយគោយន្តកន្ត្រៃ បណ្ដាលឲ្យបុរសរងរបួសធ្ងន់។

ហេតុការណ៍គ្រោះថ្នាក់នេះ បានកើតទ្បើងនៅចំណុចក្រុមទី១ ភូមិគារាមគន់ ឃុំគារ លើផ្លូវជាតិលេខ៥ ចន្លោះបង្គោលគីឡូម៉ែត្រលេខ ២៤៣-២៤៤ ។

ម៉ូតូកែរឆ្នៃ ០១គ្រឿង មិនស្គាល់ម៉ាក គ្មានស្លាកលេខ បើកបរដោយឈ្មោះ ម៉េត ទីន ភេទប្រុស អាយុ​ ២២ ឆ្នាំ មានលំនៅភូមិរ៉ា ឃុំមោង ស្រុកមោងឫស្សី បានធ្វើដំណើរមកពីភ្នំពេញទៅបាត់ដំបង លុះមកដល់ចំណុចកើតហេតុខាងលើ បានបុកគោយន្តកន្ត្រៃពីក្រោយ ដែលកំពុងធ្វើណើរស្របទិសគ្នា ដោយអ្នកបើកបរគោយន្ត មិនស្គាល់អត្តសញ្ញណ បានរត់គេចខ្លួនបាត់។

តាមសមត្ថកិច្ចបានឲ្យដឹងថា ជនរងគ្រោះ ត្រូវបានបញ្ជូនទៅមន្ទីពេទ្យខេត្តបាត់ដំបង ចំណែកឯសម្ភារៈវិញ រួមមានម៉ូតូ និងគោយន្តកន្ត្រៃ ត្រូវបានយកមករក្សាទុក នៅជំនាញអធិការដ្ឋាននគរបាល ដើម្បីបន្តការស៊ើបអង្កេត៕