ភ្នំពេញៈ រថយន្តសណ្តោងធន់ធំមួយគ្រឿង បានបុករះរថយន្តចំនួន ២គ្រឿង និងម៉ូតូរម៉កចំនួន២គ្រឿង បណ្តាលឲ្យរងការខូចខាតយ៉ាងដំណំ ខណៈដែលរថន្តមួយគ្រឿងបើកមកដល់ចំណុចខាងលើ ហើយដាច់ហ្វ្រងជាន់មិនស៊ីបុកជាបន្តបន្ទាប់នោះ សំណាងល្អមិនបង្កឲ្យមានមនុស្សណាម្នាក់រងគ្រោះថ្នាក់។

ករណីគ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង ៤ និង ៣០នាទីល្ងាច ថ្ងៃទី៧ ខែ កញ្ញា ឆ្នាំ ២០១៧ នៅតាមបណ្តោយផ្លូវម៉ៅសេទុង ខាងមុខសាលាខណ្ឌចំការមន ក្នុងសង្កាត់បឹងកេងកងទី៣ ខណ្ឌចំការមន រាជធានីភ្នំពេញ។

តាមប្រភពព័ត៌មានពីសមត្ថកិច្ចម្នាក់បានប្រាប់ឲ្យដឹងថា មុនពេលកើតហេតុ គេបានឃើញរថយន្តម៉ាក ហ៊ីយ៉ាន់ដាយដឹកថ្ម ពណ៌ក្រហម ពាក់ស្លាកលេខ ភ្នំពេញ 3D-4755 មួយគ្រឿង បើកបរក្នុងទិសដៅពីកើតទៅលិច លុះមកដល់ចំណុចកើតហេតុខាងលើជាន់ហ្វ្រាំងមិនស៊ី រថយន្តនោះ ក៏ជ្រុលបើកទៅបុកនិងឡាំប្រឺតាមួយគ្រឿង និងជ្រុលទៅបុករម៉កដឹកស្វាយមួយគ្រឿងទៀត និងរថយន្តស៊េរីទំនើបចំនួន ២គ្រឿងទៀតជាបន្តបន្ទាប់ បណ្តាលឲ្យរងការខូចខាតយ៉ាងដំណំផងដែរ សំណាងល្អមិនបានបង្កឲ្យមនុស្សណាម្នាក់រងគ្រោះថ្នាក់។

ក្រោយពេលកើតហេតុ កម្លាំងមានសមត្ថកិច្ចមូលដ្ឋានក៏បានចុះមកដល់កន្លែងកើតហេតុធ្វើការគូសវាស និងឲ្យរថយន្តដឹកថ្មបង្ក ឡាំប្រឺតា រម៉កដឹកស្វាយ និងរថយន្តចំនួន ២គ្រឿងទៀតដែលរងគ្រោះទៅចតលើចិញ្ចើមផ្លូវ ដើម្បីធ្វើការដោះស្រាយគ្នាផងដែរ៕