ព្រះសីហនុៈ យោងតាមសេចក្តីរាយការណ៍បានឲ្យដឹងថា មានករណីគ្រោះថ្នាក់ចរាចរណ៍មួយបានកើតឡើង ដោយមានរថយន្តចំនួន៣គ្រឿង បានបុកបន្តកន្ទុយគ្នា បណ្តាលឲ្យរងការខូចខាតយ៉ាងដំណំ សំណាងល្អណាស់គ្មាននរណាម្នាក់រងរបួស។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១១និង៣៥នាទី ថ្ងៃត្រង់ទី៩ ខែកញ្ញា ឆ្នាំ២០១៧ ស្ថិតនៅចំណុចតាមបណ្តោយផ្លូវជាតិលេខ៤ ចន្លោះគីឡូម៉ែត្រ១៩៤-១៩៥ ក្នុងភូមិអូចំណារ ឃុំអូឧកញ្ញ៉ាហេង ស្រុកព្រៃនប់ ខេត្តព្រះសីហនុ។

ក្នុងនោះដែរ គ្រោះថ្នាក់ចរាចរណ៍នេះកើតឡើង បន្ទាប់ពីរថយន្តម៉ាកកាមរីបាឡែន បើកបរខ្វះការប្រុងប្រយត្ន័ បានជ្រុលទៅបុកប៉ះពីក្រោយរថយន្តក្រុងមួយគ្រឿង ដែលនៅខាងមុខកំពុងធ្វើដំណើរស្របគ្នាគេចពីម៉ូតូគេបត់នៅខាងមុខ ស្រាប់តែពេលនោះក៏មានរថយន្តក្រុងមួយគ្រឿងផ្សេងទៀតបើកបរពីក្រោយ បានជ្រុលមកបុកប៉ះពីក្រោយរថយន្តបាឡែនបន្តកន្ទុយគា្នបណ្តាលឲ្យរងការខូចខាតតែម្តង សំណាងគ្មាននរណាម្នាក់រងរបួសនោះទេ៕