(ព្រះវិហារ)៖ មនុស្សចាស់ក្មេង ៤នាក់ រងរបួសធ្ងន់-ស្រាល ត្រូវបានដឹកយកទៅសង្គ្រោះព្យាបាលនៅមន្ទីរពេទ្យស្រុករវៀង ភ្លាមៗ បន្ទាប់ពីជួបគ្រោះថ្នាក់ចរាចរ រថយន្តសាំយ៉ុង ២គ្រឿងបុកគ្នា ។
ហេតុការណ៍នេះ បានកើតទ្បើងកាលពីវេលាម៉ោង៤ និង ២៥នាទីសៀល ថ្ងៃទី០៧ មេសា ២០១៦ នៅលើដងផ្លូវជាតិលេខ៦២ ស្ថិតនៅភូមិរំចេក ឃុំរមណីយ ស្រុករវៀង ខេត្តព្រះវិហារ។
អ្នកឃើញហេតុការណ៍ បានឱ្យដឹងថា គ្រោះថ្នាក់ចរាចរណ៍នេះ បណ្តាលមកពីតៃកុងបើកបររថយន្តសាំយ៉ុង ពណ៌ស ១គ្រឿង ក្នុងស្ថានភាពស្រវឹងស្រា ហើយបានរ៉េចង្កូតទៅបុករថយន្តសាំយ៉ុង ១គ្រឿងទៀត យ៉ាងពេញទំហឹង ក្នុងទិសដៅបញ្ច្រាសគ្នា។ ម្ចាស់រថយន្តរងគ្រោះនោះ រកស៊ីមុខរបរដឹកសម្ភារ:ប្រើប្រាស់ លក់តាមភូមិ។
ប្រភពព័ត៌មានដដែល បានបញ្ជាក់ថា ក្មេងប្រុសម្នាក់រងរបួសស្រាល និងមនុស្សចាស់ ៣នាក់ទៀត រងរបួសធ្ងន់។ រថយន្តទាំង ២គ្រឿង ត្រូវបាននគរបាលប៉ុស្ដិ៍រដ្ឋបាលរមណីយ យកទៅរក្សាទុក ដើម្បីដោះស្រាយទៅតាមផ្លូវច្បាប់៕
មតិយោបល់