ព្រៃវែងៈ លោកវរសេនីយ៍ទោ ឡុង ប៊ុនធឿន អធិការស្រុកស៊ីធរកណ្តាល បានប្រាប់Post Newsថា មានករណីគ្រោះថ្នាក់ចរាចរណ៍មួយបានកើតឡើង បន្ទាប់ពីមានរថយន្តម៉ាកឡិចស៊ីស RX300 មួយគ្រឿង បើកបរជាលក្ខណៈគ្រួសារត្រឡប់មកពីលេងផ្ទះដន្លងវិញ ស្រាប់តែបើកធ្លាក់ផ្លូវក្រឡាប់ចូលប្រឡាយនៅជាប់ផ្លូវតែម្តង បណ្តាលឲ្យមនុស្សដែលជិះក្នុងរថយន្តចំនួន៩នាក់ រងរបួសស្រាល។

ហេតុការណ៍នេះបានកើតឡើង កាលពីវេលាម៉ោង ៩និង១៥នាទី ព្រឹកថ្ងៃទី១៧ ខែកញ្ញា ឆ្នាំ២០១៧ ស្ថិតនៅចំណុចផ្លូវលំក្រាលគ្រួសក្រហម ខាងលិចសាលាស្រុកខាងត្បូង ភូមិរលាំង ឃំុរំលេច ស្រុកសុីធរកណ្តាល ខេត្តព្រៃវែង។

រថយន្តដែលក្រឡាប់ធ្លាក់ផ្លូវនេះ ជាប្រភេទរថយន្តម៉ាកឡិចស៊ីស RX300 ពាក់ស្លាកលេខ ភ្នំពេញ 2X-8252 បើកបរដោយឈ្មោះ ខៀវ ចាន់សង ភេទប្រុស អាយុ៣៩ឆ្នាំ រស់នៅភូមិរកាកោងឃំុមហាលាភ ស្រុកកោះសូទិន ខេត្តកំពង់ចាម និងបណ្តាលឲ្យក្រឡាប់ធ្លាក់ចូលក្នុងប្រឡាយ ដោយខ្លួនឯងតែម្តង រហូតបណ្តាលឲ្យមនុស្សរួមដំណើរនៅលើរថយន្តចំនួន៩នាក់ ក្នុងនោះមានស្រី៣នាក់ រស់នៅភូមិឃុំជាមួយគ្នារងរបួសស្រាល៕