ក្រុមស្តេចស Real Madrid នឹងត្រូវធ្វើដំណើរទៅជួបក្រុមម្ចាស់ផ្ទះ Real Socieded នាវេលាម៉ោង ២ និង ៤៥នាទីរំលងអាធ្រាត្រយប់នេះ នាការប្រកួតក្របខ័ណ្ឌ Spanish Laliga សប្តាហ៍ទី៤។

ជាការពិតណាស់ Real Madrid ពិតជាស្រេកឃ្លាន ជ័យជម្នះយ៉ាងខ្លាំង ក្នុងសប្តាហ៍ទី៤នេះ ព្រោះថាក្រុមការពារជើងឯកមួយនេះ បានភ្លាត់ស្មើ ២ប្រកួតជាប់គ្នាកន្លងមកហើយ។ យ៉ាងណាវិញ ក្រុម Real Socieded មិនមែនជាក្រុមមួយដែលងាយស្រួល ក្នុងការផ្តួលក្នុងទឹកដីឡើយ ខណៈ ក្រុមនេះ ជាក្រុមដែលរឹងមាំក្នុងដីណាស់។ បន្ថែមលើនេះ សូម្បីក្រុម Barcelona ដែលជាក្រុមខ្លាំងមួយនោះ ក៍បានរងបរាជ័យ ក្នុងទឹកដីក្រុម Real Socieded នេះប៉ុន្មានរដូវកាលកន្លងមកហើយ។ ក៍ប៉ុន្តែ សម្រាប់ក្រុម Real Madrid វិញ ហាក់ដូចជាមិនសូវជាព្រួយបារម្ភក្នុងការធ្វើដំណើរទៅកាន់ទឹកដីរបស់ក្រុម Real Socieded ឡើយ ព្រោះថា Real Madrid លេងដោយមានទំនុកចិត្តខ្ពស់បំផុត។ ម្យ៉ាងវិញទៀតនោះ កាលពីរដូវកាលមុន ក្រុម Real Madrid បានលុតក្រុម Real Socieded ក្នុងលទ្ធផល ៣-០ ទាំងក្នុងដី និងក្រៅដី ជាហេតុធ្វើឲ្យ ក្រុមស្តេចស មានក្តីសង្ឃឹមច្រើន ក្នុងការប្រកួតនេះ។

យ៉ាងណាវិញ ប្រព័ន្ធប្រយុទ្ធរបស់ក្រុម Real Madrid នៅមិនទាន់ពេញជើងឡើយ ព្រោះថា កំពូលខ្សែប្រយុទ្ធ Cristiano Ronaldo មិនទាន់អាចចូលលេងបាន ដោយសារមិនទាន់រួចពីពិន័យ បើទោះបីជា Gareth Bale ចាប់ផ្តើមបង្ហាញទម្រង់លេងយ៉ាងល្អវិញហើយក៍ដោយ។