ព្រះសីហនុ: តាមសមត្ថកិច្ច បានឲ្យដឹងថា កាលពីវេលាម៉ោងប្រមាណ១ ០៦ ល្ងាចថ្ងៃទី១៩ ខែកញ្ញានេះ មាននារីម្នាក់ ប៉ុនប៉ុងចង់ធ្វើអត្តឃាតខ្លួនឯង ដោយលោតទឹកសម្លាប់ខ្លួន នៅចុងផែដឹកភ្ញៀវទេសចរណ៍អូរឈើទាល ខេត្តព្រះសីហនុ។
ការប៉ុនប៉ុងនេះដែរ មិនបានសម្រេចនោះទេ ដោយត្រូវបានភ្នាក់ងារឆ្មាំសមុទ្រ និងនគរបាលទេសចរណ៍ ចុះទៅស្រង់បានមកវិញ ហើយក៏យកមកសង្គ្រោះនៅមន្ទីរពេទ្យឯកជនដើមស្វាយ។
ជនរងគ្រោះ ឈ្មោះគិន ស្រីនិច ភេទស្រី អាយុ២០ ឆ្នាំ ទីលំនៅភូមិ២ឃុំចម្ការអណ្តូង ស្រុកចម្ការលើ ខេត្តកំពង់ចាម។
តាមសមត្ថកិច្ច បានបញ្ជាក់ថា ដោយសារជនរងគ្រោះ ខឹងនឹងមិត្តប្រុសខ្លួន ដែលជាជនជាតិឥណ្ឌូនេស៊ី ទើបនាងបានសម្រេចចិត្តមកលោតទឹកសម្លាប់ខ្លួនបែបនេះ។
ក្រោយការជួយសង្គ្រោះពីខាងមន្ទីរពេទ្យ នៅម៉ោងប្រមាណ០៨ យប់ថ្ងៃដដែល ជនរងគ្រោះបានដឹងខ្លួនវិញហើយ ប៉ុន្តែគ្រូពេទ្យអះអាងថា ស្ថានភាពជំងឺនៅធ្ងន់ធ្ងរនៅទ្បើយទេ ពីព្រោះទឹកបានចូលក្នុងសួតច្រើនពេក។
សូមជំរាបថា មកទល់ពេលនេះជនរងគ្រោះ មិនមានសាច់ញាតិជិតស្និទ្ធ នៅចាំមើលថែ ក្រៅពីមិត្តប្រុសខ្លួន ដែលជាជនជាតិឥណ្ឌូនេស៊ីម្នាក់នោះទេ៕
មតិយោបល់