កណ្តាល: គ្រោះថ្នាក់ចរាចរណ៍មួយកើតឡើង បន្ទាប់ពីមានរថយន្តមិនស្គាល់ម៉ាកមួយគ្រឿង បានបើកទៅបុកគោមួយក្បាលបណ្តាលឲ្យរបួសធ្ងន់ គាប់ជួនមានម៉ូតូមួយគ្រឿងទៀតបើកមកទាន់បុកបន្ថែមទៀត បណ្តាលឲ្យបុរសវ័យចំណាស់ម្នាក់រងរបួសធ្ងន់តែម្តង។
ហេតុការណ៍នេះកើតឡើងកាលពីវេលាម៉ោង៧និង១៥នាទីយប់ ថ្ងៃទី២២ ខែកញ្ញា ឆ្នាំ២០១៧ ស្ថិតនៅចំណុចលើស្ពាន៦០ម៉ែត្រ ផ្លូវ៦០ម៉ែត្រ ភូមិបត្តាជី សង្កាត់ព្រែកហូរ ក្រុងតាខ្មៅ ខេត្តកណ្តាល។
គ្រោះថ្នាក់ចរាចរណ៍នេះ កើតឡើងរវាងរថយន្តមួយគ្រឿង មិនស្គាល់ម៉ាកមិនស្គាល់ពណ៌ មិនស្គាល់ស្លាកលេខ អ្នកបើកបរមិនស្គាល់អត្តសញ្ញាណ (បើករថយន្តរត់បាត់ពីកន្លែងកើតហេតុ) បើកបរក្នុងទិសដៅពីជើងមកត្បូង ពេលដល់ចំណុចកើតហេតុខាងលើក៏បានបុកសត្វគោមួយក្បាល ពណ៌សដើរក្នុងទិសដៅពីលិចឆ្លងផ្លូវទៅកើត បណ្តាលឲ្យគោរងរបួសធ្ងន់ដេកដួលនៅកណ្តាលផ្លូវ ហើយស្របពេលនោះក៏មានម៉ូតូមួយគ្រឿងម៉ាក SUZUKI SMASH ពណ៌ខ្មៅ ពាក់ស្លាកលេខ ក្រចេះ 1A-9780 (មិនពាក់មួកសុវត្ថិភាពនិងគ្មានកញ្ចក់) បើកបរក្នុងទិសដៅពីត្បូងមកជើង ក៏បានបុកសត្វគោខាងលើបន្ថែមទៀត បណ្តាលឲ្យអ្នកបើកបរម៉ូតូឈ្មោះ ឈឹម សុផា ភេទប្រុស អាយុ៥៧ឆ្នាំ មានទីលំនៅភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ រងរបួសធ្ងន់ ត្រូវបានរថយន្តសង្គ្រោះ របស់ស្នងការដ្ឋាននគរបាលខេត្តកណ្តាលដឹកបញ្ជូនមកមន្ទីរពេទ្យជ័យជម្នះ៕
មតិយោបល់