ភ្នំពេញៈ ហេតុការណ៍ភ្ញាក់ផ្អើលមួយបានកើតឡើង បន្ទាប់ពីមានក្មេងទំនើងចំនួន២ក្រុម បានឈ្លោះគ្នាយ៉ាងខ្លាំងរហូតមានការផ្ទុះអាវុធចំនួន៤គ្រាប់ ទាំងកណ្តាលយប់ តែសំណាងល្អណាស់មិនបណ្តាលឲ្យមានមនុស្សរងរបួសនោះទេ គ្រាន់តែបង្កជាការភ្ញាក់ផ្អើលដល់ប្រជាពលរដ្ឋ ដែលរស់នៅក្បែរនោះនិងអ្នកដំណើរតាមផ្លូវតែប៉ុណ្ណោះ។

ហេតុការណ៍ផ្ទុះអាវុធពីសំណាក់ក្រុមក្មេងស្ទាវទាំងនេះ កើតឡើងនៅវេលាម៉ោង១២និង១០នាទីយប់ឈានចូលថ្ងៃទី២៦ ខែកញ្ញា ឆ្នាំ២០១៧ ស្ថិតនៅតាមផ្លូវព្រះមុនីវង្ស​ កែងផ្លូវ២៤២ ក្នុងសង្កាត់បឹងព្រលឹត ខណ្ឌ៧មករា រាជធានីភ្នំពេញ ។

បន្ទាប់ពីបាញ់បោះរួចហើយនោះ គេបានឃើញភាគីម្ខាងមុននឹងចេញទៅ គឺបាននាំគ្នារើសសំបកគ្រាប់ចំនួន៣គ្រាប់ ដោយបន្សល់ទុកនៅកន្លែង១គ្រាប់ ហើយបានគេចចេញពីកន្លែងកើតហេតុបាត់ស្រមោលតែម្តង៕