កំពង់ស្ពឺៈ លោក តាប់ លន ស្នងការរងខេត្តកំពង់ស្ពឺ ទទួលផែនសណ្តាប់និងចរារចណ៍ បានប្រាប់ Post News ថា មានករណីគ្រោះថ្នាក់ចរាចរណ៍រវាងរថយន្តនិងរថយន្ត បណ្តាលឲ្យបុរសស្លាប់នៅនឹងកន្លែង។
ហេតុការណ៍កើតឡើងនៅវេលាម៉ោង៦ និង១៥នាទីយប់ ថ្ងៃទី២៧ ខែកញ្ញា ឆ្នាំ២០១៧ នៅលើកំណាត់ផ្លូវជាតិលេខ៤ ចន្លោះគីឡូម៉ែត្រ៣៨-៣៩ ត្រង់ចំណុចភូមិអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ។

មុនពេលកើតហេតុ គេឃើញមានរថយន្ដ១គ្រឿង ម៉ាកហ៊ីយ៉ាន់ដាយ (ប្រភេទបែន) ពណ៌ស គ្មានស្លាកលេខ បើកបរដោយឈ្នោះ ស៊ុ ភត្រ្ដា ភេទប្រុស អាយុ២១ឆ្នាំ ស្នាក់នៅភូមិអន្លង់បារាំង ឃុំរលាំងកែន ស្រុកកណ្ដាលស្ទឹង ខេត្តកណ្ដាល និងអ្នករួមដំណើរដោយឈ្មោះ មាស ណុប ភេទប្រុស អាយុ២៥ឆ្នាំ ស្នាក់នៅភូមិត្រពាំងស្ទង ឃុំស្នំក្រពើ ស្រុកគងពិសី ខេត្តកំពង់ស្ពឺ បើកបរមកពីកើតទៅលិច លុះមកដល់ចំណុចខាងលើ បានបុករថយន្ដ១គ្រឿងម៉ាក នីសាន់ (ប្រភេទបែន) ពណ៌ទឹកប៊ិច ពាក់ស្លាកលេខ ពោធិ៍សាត់3A.0660 អ្នកបើកបរឈ្មោះ វ៉ាន់ រដ្ឋា ភេទប្រុស អាយុ២៨ឆ្នាំ ស្នាក់នៅភូមិបែកចាន ឃុំបែកចាន ស្រុកអង្គស្នួល ខេត្តកណ្តាល ដែលកំពុងបើកបររបញ្ច្រាសទិសគ្នា បណ្តាលឲ្យឈ្មោះ មាស ណុប ស្លាប់នៅនឹងន្លែងកើតហេតុ។

សាកសពជនរងគ្រោះ បានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។ ចំណែកអ្នកបើករថយន្តនីសាន់រងរបួសស្រាល បានបញ្ជូនទៅព្យាបាលរបួសនៅពេទ្យសម្ភពថ្នល់ទទឹង។

ក្រោយពេលកើតហេតុ សមត្ថកិច្ចបានចុះទៅដល់កន្លែង ធ្វើការវាស់វែងនាំយកវត្ថុតាងទាំង២គ្រឿងរក្សាទុកនៅអធិការដ្ឋាននគរបាលស្រុកសំរោងទង។ ចំណែកអ្នកបើកបររថយន្ដបង្កត្រូវបានសមត្ថកិច្ចឃាត់ខ្លួននិងកសាងសំណុំរឿងចាត់ការតាម នីតិវិធីច្បាប់៕