យោងតាមទីភ្នាក់ងារព័ត៌មាន AFP សហរដ្ឋអាមេរិក និងប្រទេសរុស្ស៊ី នឹងធ្វើការជាមួយគ្នាលើកម្មវិធីរបស់អង្គការ NASA មួយ ដើម្បីស្ថាបនាស្ថានីយអវកាសថ្មីមួយឈ្មោះថា Deep Space Gateway នៅលើគន្លងភពព្រះចន្ទ។

ក្រុមហ៊ុន Roscosmos របស់រុស្សុី និងអង្គការ NASA បានចុះហេត្ថលេខាលើកិច្ចព្រមព្រៀងមួយដើម្បីប្រតិបត្តិការលើស្ថានីយអវកាសនោះ ដែលវានឹងក្លាយជាទីចំណតដ៏សែនសំខាន់មួយសម្រាប់ការរុករកដោយគ្រឿងយន្តស្វ័យប្រវត្តិ និងមនុស្សនៅលើផ្ទៃនៃភពព្រះចន្ទ ហើយក៏ជាចំណុចចាប់ផ្តើមសម្រាប់បេសកកម្មលើលំហរអវកាសទៅកាន់ភពអង្គារ និងសុក្រផងដែរ។

តាមរយៈក្នុងកិច្ចព្រមព្រៀងលើកម្មវិធីដែលដឹកនាំដោយអង្គការ NASA នេះ ក្រុម​ហ៊ុន Roscosmos នឹងផ្តល់វិភាគទានក្នុងការសាងសង់ផែសម្រាប់យានចូលសំចត និងប្រព័ន្ធទ្រទ្រង់ជីវិត ហើយគ្រាប់រ៉ូកែតរបស់រុស្ស៊ីនឹងប្រើសម្រាប់គាំទ្រជា​មួយការស្ថាបនាស្ថានីយ។ នេះបើយោងតាមប្រពភព័ត៌មានពី Engadget។

តាមរយៈគម្រោងនេះដែរ NASA ចង់ចាប់ផ្តើមធ្វើការលើស្ថានីយថ្មីនេះ ជាមួយការបញ្ជូនក្រុមអវកាសយានិកចំនួន ៤ នាក់ នៅពាក់កណ្តាលឆ្នាំ ២០២០ ហើយខ្លួននឹង​បោះជំហានទៅមុខមួយជំហានទៀតដើម្បីទៅដល់គោលដៅរបស់ខ្លួន ក្នុងការបញ្ចូនមនុស្សទៅកាន់ភពព្រះអង្គារក្នុងឆ្នាំ ២០៣០៕

ប្រភពព័ត៌មានៈ foxnews