ព័ត៌មានជាតិ

អាវុធហត្ថក្រុងភ្នំពេញបញ្ជូន បុរស៣នាក់ ទៅតុលាការ ពាក់ព័ន្ធរឿង យកកុមារដើរសុំទាន

ភ្នំពេញ: នៅថ្ងៃទី៣ ខែតុលា ឆ្នាំ២០១៧នេះ កម្លាំងកងរាជអាវុធហត្ថរាជធានីភ្នំពេញ បានបញ្ជូនបុរសសង្ស័យ៣នាក់ ទៅកាន់អយ្យការអមសាលាដំបូងរាជធានីភ្នំពេញ ពាក់ព័ន្ធករណី កេងប្រវ័ញ្ចពលកម្មកុមារ និងប្រើហិង្សាគំរាមកុមារឲ្យដើរសុំទាន។

យោងតាមប្រភពពីសមត្ថកិច្ច បានឱ្យដឹងថា ជនសង្ស័យ៖
-ទី១ឈ្មោះ ឃុត នឹម ហៅ តាលឹម ភេទប្រុស អាយុ ៥៥ឆ្នាំ ជាបុគ្គលិកជាប់កិច្ចសន្យា មន្ទីរសង្គមកិច្ច។
-ទី២ឈ្មោះ ហឹង សារ៉ូម ហៅ តារុំ ភេទប្រុសអាយុ ៤២ឆ្នាំ ជាបុគ្គលិកជាប់កិច្ចសន្យា មន្ទីរសង្គមកិច្ច។
-និងទី៣ឈ្មោះ សាន សិត ភេទប្រុស អាយុ៤១ឆ្នាំ អតីតជាអ្នកសុំទាន។

បច្ចុប្បន្នជាអ្នកដើរប្រមូលលុយពីអ្នកសុំទានតាមភ្លើងស្តុប ឲ្យទៅឈ្មោះ ឃុត នឹម ហៅតាលឹម និងឈ្មោះ ហឹង សារ៉ូម ហៅ តារុំ។

ជនសង្ស័យទាំង៣នាក់ខាងលើត្រូវបានសមត្ថកិច្ចកងរាជអាវុធហត្ថរាជធានីភ្នំពេញ សហការជាមួយ លោកស្រី មុំ ចាន់ដានី ជាប្រធានស្តីទី នៃមន្ទីរសង្គមកិច្ចអតីតយុទ្ធជន និងស្តារនិតិសម្បទា រាជធានីភ្នំពេញ ឃាត់ខ្លួនកាលពីថ្ងៃទី១ ខែតុលា ឆ្នាំ២០១៧ កន្លងទៅ ក្រោយពីរកឃើញថាពួកគេបាន ទទួលយកផលប្រយោជន៍ពីអ្នកសុំទាន និងជារនុកក្នុងផ្តល់ព័ត៌មានដល់អ្នកសុំទាន ធ្វើការគេចខ្លួនពីការ ចុះបង្ក្រាប របស់មន្ទីរសង្គមកិច្ច និងសមត្ថកិច្ចផងដែរ។

នៅចំពោះមុខសមត្ថិច្ច ជនសង្ស័យទាំង ៣នាក់ បានសារភាពថា ពួកគេបានធ្វើសកម្មភាពប្រមូលលុយ ពីអ្នកសុំទានរៀងរាល់ថ្ងៃ នៅតាមភ្លើងស្តុប ដោយអ្នកសុំទានម្នាក់ត្រូវបង់ ១ម៉ឺន ទៅ ១២,០០០ រៀលក្នុង១ថ្ងៃ។

ដោយមានឈ្មោះសាន សិត ជាអ្នកដើរប្រមូល និងក្នុងមួយអាទិត្យ ទើបយកលុយប្រគល់ឲ្យឈ្មោះ តាលឹម និងឈ្មោះ តារុំ ម្តង។

ឈ្មោះ តាលឹម យកចំណែកអ្នកដើរសុំនៅស្តុបអាងទឹក ស្តុបពេទ្យចិន ស្តុបផ្សារដើមគោ និងភូមិសាស្ត្រក្បែរគ្នា។

ឈ្មោះ តារុំ យកចំណែកអ្នកដើរសុំនៅស្តុបកាណាឌីយ៉ា ស្តុបបូកគោ និងប៉ែកខាងមាត់ទន្លេ។

ការយកលុយរបស់ តាលឹម និងតារុំ ពីអ្នកសុំទាននេះ ជាថ្នូរជាមួយនឹងការផ្តល់ព័ត៌មាន នៅពេលណាដែល មន្ទីរសង្គមកិច្ច និងសមត្ថកិច្ចចុះបោសសំអាតប្រមូលអ្នកសុំទាន អ្នកញៀនថ្នាំ និងក្មេងអានាថាតាមដងផ្លូវ តែបើពួកអ្នកសុំទានទាំងនោះ មិនព្រមបង់លុយឱ្យទេ ឈ្មោះ សាន សិត គំរាមថា នឹងរាយការណ៍ឱ្យយខាងមន្ទីរសង្គមកិច្ចនិងសមត្ថកិច្ច ចុះចាប់ពួកគេ ក្នុងនោះក៏មាន អ្នកសុំទានជាច្រើន ពិតជាត្រូវបាន ឈ្មោះ សាន សិត រាយការណ៍ ឱ្យ តាលឹម និងតារុំ នាំក្រុមការងារសង្គមកិច្ចចុះបង្ក្រាបមែន ពេលដែលពួកគេមិនព្រមបង់លុយតាមការទាមទារ៕

មតិយោបល់