ភ្នំពេញ: រថយន្តកូរ៉េ២តោនកន្លះមួយគ្រឿង ដឹកសម្ភារ: សេះហោះ កន្ត្រកវិល បើកឆ្លងផ្លូវមកបុកម៉ូតូ១គ្រឿងជិះគ្នា៣នាក់ បណ្តាលឲ្យបុរសម្នាក់ដែលជិះពីក្រោយគេ ស្លាប់នៅនឹងកន្លែងកើតហេតុ។ ចំណែកបុរស២នាក់ទៀតរងរបួសស្រាល ។ ក្រោយបង្កហេតុហើយ រថយន្តបានបន្ថែមល្បឿនរត់ដោយមាន
យុវជន២នាក់ជិះម៉ូតូតាមពីក្រោយ រហូតដល់កន្លែងរថយន្តត្រូវឈប់ទើបបកមកប្រាប់សមត្ថកិច្ចឲ្យទៅមើល។

ហេតុការណ៍នេះកើតឡើងនៅវេលាម៉ោង១០និង៤៥នាទីយប់ថ្ងៃទី៣ ខែតុលា ឆ្នាំ២០១៧ នៅចំណុចមុខរោងចក្រប៊ឺរី លើផ្លូវអូរដឹម កប់ស្រូវ ស្ថិតក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។

បុរសដែលស្លាប់បាត់បង់ជីវិតមានឈ្មោះ មុំ ឈឿន អាយុ៣០ឆ្នាំជាង មុខរបរបើកបររថយន្ត ស្នាក់នៅផ្ទះជួល ភូមិព្រៃព្រីងខាងត្បូង សង្កាត់ចោមចៅ មានស្រុកកំណើតនៅស្រុកត្បូងឃ្មំ ខេត្តត្បូងឃ្មំ ជិះម៉ូតូម៉ាកហុងដាវ៉េវអ៉ី ពណ៌ខ្មៅ ពាក់ស្លាកលេខ 1O-2286។ ចំណែកជនរងគ្រោះ២នាក់ដែលរបួសស្រាលត្រូវជាកូន និងក្មួយ របស់សព។ ដោយឡែករថយន្តបង្កម៉ាក ហ៊ីយ៉ានដាយ ពណ៌សដឹកសម្ភារ: សេះហោះកន្ត្រកវិល ពាក់ស្លាកលេខ កំពត 3A-0274 បើកបរដោយបុរសមិនស្គាល់អត្តសញ្ញាណ ព្រោះក្រោយកើតហេតុអ្នកបើកបរបានរត់ចោលចោលរថយន្តបាត់ស្រមោលឈឹង ។

តាមសាក្សីជនរងគ្រោះដែលរួមដំណើរជាមួយបានឲ្យដឹងថាមុនពេលកើតហេតុ ពួកគេធ្វើដំណើរចេញពីផ្ទះ គោលដៅទៅការ៉ាស់ដាក់រថយន្ត ដោយជិះម៉ូតូតាមបណ្តោយផ្លូវអូរដឹមកប់ស្រូវក្នុងទិសដៅពីត្បូងទៅជើង ចំណែករថយន្តរថយន្តបង្កបើកបរក្នុងទិសដៅបញ្ច្រាសទិសគ្នាពីជើងទៅត្បូង ក្នុងល្បឿនលុះមកដល់ចំណុចកើតហេតុ រថយន្តបានបត់ចូលមកផ្លូវទៅផ្សារឯករាជ្យ លឿនអត់បានស៊ីញ៉ូ បណ្តាលឲ្យបុកម៉ូតូរបស់ពួកគាត់ពេញទំហឹង ធ្លាក់ ជនរងគ្រោះពីម៉ូតូខ្ទាតចូលក្រោមកង់រថយន្ត បណ្តាលឲ្យរថយន្តកិនចំទ្រូងជនរងគ្រោះ បណ្តាលឲ្យស្លាប់ភ្លាមៗតែកន្លែងកើតហេតុ។

ក្រោយកើតហេតុ សមត្ថកិច្ចមូលដ្ឋានសហការជាមួយជំនាញចរាចរណ៍ខណ្ឌ ចុះទៅជួយអន្តរាគមន៍នៅកន្លែងកើតហេតុ និងបានទាក់ទៅជំនាញចរាចរណ៍ក្រុង ឲ្យចុះមកវាស់វែងនិងធ្វើកំណត់ហេតុ ប្រគល់សពឲ្យទៅសាច់ញាតិយកទៅធ្វើបុណ្យតាមប្រពៃណីនៅឯស្រុកកំណើត។ រីឯរថយន្តបង្កទៅរក្សាទុកនៅស្នងការដ្ឋាននគរបាលរាជធានីភ្នំពេញដើម្បីឲ្យម្ចាស់រថយន្តចូលខ្លួនមកដោះស្រាយតាមផ្លូវច្បាប់៕