ព្រះសីហនុៈ ជនសង្ស័យចំនួន៥នាក់ ដែលជាមុខសញ្ញាគ្រឿងញៀន និងឆក់យ៉ាងសកម្មនៅក្នុងខេត្តព្រះសីហនុ ត្រូវបានសមត្ថកិច្ចកម្លាំងការិយាល័យកណ្តាលនគរបាលព្រហ្មទណ្ឌ សហការជាមួយកម្លាំងប៉ុស្តិ៍នគរបាលរដ្ឋបាលសង្កាត់លេខ៤ នៃអធិការក្រុងព្រះសីហនុ ធ្វើការឃាត់ខ្លួនបាន ក្រោយពីពួកគេទាំងនេះបានធ្វើសកម្មភាពឆក់ស្ត្រីជនជាតិចិនដែលកំពុងដើរទៅសណ្ឋាគារ ហ្គ្រេនស៊ីហ្គោល។

ហេតុការណ៍នេះកើតឡើងកាលពីវេលាម៉ោង៩យប់ ថ្ងៃទី៥ ខែតុលា ឆ្នាំ២០១៧ ស្ថិតនៅចំណុចក្រុម១៤ ភូមិ៤ សង្កាត់៤ ក្រុងព្រះសីហនុ ខេត្តព្រះសីហនុ។

ជនសង្ស័យទាំង៥នាក់ខាងលើ រួមមាន៖
ទី១.ឈ្មោះ ឡុង ស៊ីពេជ្រ ភេទប្រុស ជនជាតិវៀតណាម អាយុ១៧ឆ្នាំ មុខរបរមិនពិតប្រាកដ មានទីលំនៅ ភូមិ១ សង្កាត់៤ ក្រុង-ខេត្តព្រះសីហនុ (មុខសញ្ញាឆក់សកម្ម និងកាន់កាប់រក្សាទុកសាធាតុញៀន) ។
ទី២.ឈ្មោះ គឹង ដែន ហៅពៅ ភេទប្រុស អាយុ១៧ឆ្នាំ មុខរបរ មិនពិតប្រាកដ មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ (មុខសញ្ញាឆក់សកម្ម) ។
ទី៣.ឈ្មោះ មុំ ញ៉ាញ់ ភេទប្រុស អាយុ១៧ឆ្នាំ មុខរបរមិនពិតប្រាកដ មានទីលំនៅភូមិ៤ សង្កាត់៤ ក្រុង-ខេត្តព្រះសីហនុ (មុខសញ្ញាឆក់សកម្ម) ។
ទី៤.ឈ្មោះ វ៉ាន់ មាន ភេទប្រុស អាយុ១៧ឆ្នាំ មុខរបរបុគ្គលិកខ្សែកាប មានទីលំនៅក្រុម២៧ ភូមិ១ សង្កាត់២ ក្រុង-ខេត្តព្រះសីហនុ (មុខសញ្ញាកាន់កាប់រក្សាទុកសាធាតុញៀន) ។
និងទី៥.ឈ្មោះ សុង យ៉ាំង ភេទប្រុស អាយុ១៧ឆ្នាំ មុខរបររត់ម៉ូតូឌុប មានទីលំនៅសង្កាត់៤ ក្រុង-ខេត្តព្រះសីហនុ (មុខសញ្ញាកាន់កាប់រក្សាទុកសាធាតុញៀន) ។

ប្រភពព័ត៌មានបានឲ្យដឹងថា នៅថ្ងៃទី៣ ខែតុលា ឆ្នាំ២០១៧ វេលាម៉ោង៨យប់ ជនសង្ស័យឈ្មោះ ឡុង ស៊ីពេជ្រ និងបក្ខពួក បានធ្វើសកម្មភាព ឆក់ជនរងគ្រោះឈ្មោះ CHEN BAO ZHEN ភេទស្រី អាយុ៤៧ឆ្នាំ ជនជាតិចិន មុខរបរ ទេសចរ ខណៈពេលដែលជនរងគ្រោះកំពុងដើរទៅសណ្ឋាគារ ហ្គ្រេនស៊ីហ្គោល ស្ថិតនៅចំណុច ក្រុម១៥ ភូមិ៤ សង្កាត់៤ ក្រុង-ខេត្តព្រះសីហនុ ។

ក្នុងនោះដែរ សម្ភារៈដែលបាត់បង់រួមមាន៖ លុយចិន ២,០០០យ័ន្ត ,ប្រាក់ដុល្លារ ២០០ដុល្លារ , អត្តសញ្ញាណចិន៣ច្បាប់, កាតបើកប្រាក់ ៦ច្បាប់
និងកាតធ្វើការចំនួន ២ច្បាប់ ។

រីឯវត្ថុតាងចាប់យកបានរួមមាន៖ ម៉ូតូ ១គ្រឿង ម៉ាកស៊ុយសាគីនិច ពណ៌សបិទខៀវ គ្មានស្លាកលេខ ,ម៉ូតូ ១គ្រឿង ម៉ាក MSX ពណ៌សបិទស្វាយ គ្មានស្លាកលេខ, គ្រឿងញៀន (ម៉ាទឹកកក) ចំនួន ១៣កញ្ចប់តូចៗ ។

បច្ចុប្បន្នជនសង្ស័យទាំង៥នាក់ និងវត្ថុតាងខាងលើនេះ ត្រូវបានបញ្ជូនទៅកាន់ការិយាល័យនគរបាលព្រហ្មទណ្ឌកម្រិតស្រាល ដើម្បីក៏សាងសំណុំរឿងចាត់ការតាមនីតិវិធីច្បាប់បន្តទៀត៕