ភ្នំពេញ: យោងតាមប្រភពពីសមត្ថកិច្ចព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានបញ្ជាក់ថា នៅរសៀលថ្ងៃទី៧ ខែតុលា ឆ្នាំ២០១៧នេះ លោក ឌុច សុខសារិន ចៅក្រមស៊ើបសួរនៃសាលាដំបូងរាជធានីភ្នំពេញ បានចេញដីកាសម្រេច បង្គាប់ឲ្យឃុំខ្លួន បុរស ជាអនុប្រធាននាយកដ្ឋាន យុវនីតិសម្បទា នៃក្រសួង សង្គមកិច្ច អតីតយុទ្ធជន​ និង​យុវនិតិសម្បទា​ ដែលបានវាយ ស្ត្រីម្នាក់ព្រោះរឿង ជំពាក់លុយ ជាបណ្ដោះអាសន្ននៅពន្ធនាគារ រាជធានីភ្នំពេញ (PJ)។

លោក សៀង សុខ ជាតំណាងអយ្យការបានប្រាប់តាម Telegram ថា លោកបាន ចោទប្រកាន់លើឈ្មោះ ប្លុង ពិសិដ្ឋ ភេទប្រុស អាយុ ៣៤ឆ្នាំ មុខរបរ អនុប្រធាននាយកដ្ឋានយុវនីតិសម្បទា នៃក្រសួងសង្គមកិច្ច អតីតយុទ្ធជន និងយុវនីតិសម្បទា ស្នាក់នៅផ្ទះលេខ ១០និងលេខ ១២ បុរីពិភពថ្មិសែនសុខ ផ្លូវលេខ១ សង្កាត់ភ្នំពេញថ្មី ខណ្ឌសែនសុខ ពីបទ ហិង្សាដោយចេតនា ប្រព្រឹត្តកាលពីថ្ងៃទី០៦ ខែកញ្ញា ឆ្នាំ២០១៧ នៅក្នងភោជនីយដ្ឋាន មួយទល់មុខ បុរីអង្គរ ភ្នំពេញ ក្នុងសង្កាត់ភ្នំពេញថ្មី ខណ្ឌសែនសុខ យោងតាមមាត្រា ២១៧ នៃក្រមព្រហ្មទណ្ឌ។

គួររំលឹកថា ជនត្រូវចោទត្រូវបាន តំណាងអយ្យការនៃសាលាដំបូងក្រុងភ្នំពេញបញ្ជាឲ្យសមត្ថកិច្ច ចាប់ខ្លួន កាលពីថ្ងៃទី៦ ខែតុលា ឆ្នាំ២០១៧ ម្សិលមិញ ក្រោយពី ឈ្មោះ ប្លុង ពិសិដ្ឋ និងបក្ខពួក ឈ្មោះ គង់ ស្រុីន (កំពុងរត់គេចខ្លួន) និងឈ្មោះ ខៀវ (កំពុងរត់គេចខ្លួន) កាលពីថ្ងៃកើតហេតុបាន នាំគ្នាព្រួតវាយលើស្ត្រីម្នាក់ ហើយត្រូវគេថតបាន បង្ហោះជាវីដេអូឃ្លីប លើបណ្ដាញហ្វេសប៊ុក ដោយសារតែរឿងជំពាក់លុយ ២៥,០០០ដុល្លារ មិនព្រមសង៕

//youtu.be/lUJGHWOY_a8