ភ្នំពេញៈ ជនសង្ស័យម្នាក់ ក្នុងចំណោមបក្ខពួក២នាក់ ត្រូវកម្លាំងកងរាជអាវុធហត្ថខណ្ឌពោធិ៍សែនជ័យ ចាប់ឃាត់ខ្លួន ខណៈដែលជនល្មើសកំពុងធ្វើសកម្មភាពឆក់ទូរសព្ទពីស្ត្រីម្នាក់ជាជនជាតិចិន និយាយទូរសព្ទដើរចូលទៅក្នុងប្រលានយន្តហោះអន្តរជាតិភ្នំពេញ។

ហេតុការណ៍នេះបានកើតឡើងកាលពីវេលាម៉ោង២និង៥០នាទីរសៀល ថ្ងៃទី ៩ ខែតុលា ឆ្នាំ២០១៧ ស្ថិតនៅតាមបណ្ដោយផ្លូវសហព័ន្ធរុស្ស៊ី ក្នុងភូមិក្បាលដំរី១ សង្កាត់កាកាប១ ខណ្ឌពោធិ៍សែនជ័យ។

ជនសង្ស័យទី១ ត្រូវបានគេស្គាល់ឈ្មោះ កង ពៅ ភេទប្រុស អាយុ៣៤ឆ្នាំ មុខរបរមិនពិតប្រាកដ បច្ចុប្បន្ននៅភូមិប៉ប្រក់ខាងជើង សង្កាត់កាកាប១ ខណ្ឌពោធិ៍សែនជ័យ មានស្រុកកំណើតនៅភូមិសំរោង ឃុំសំរោងក្រោម ស្រុកបន្ទាយមាស ខេត្តកំពត និងបក្ខពួកម្នាក់ទៀតរត់គេចខ្លួនបាត់ស្រមោល។ ចំណែកឯជនរងគ្រោះឈ្មោះ Zheng xiu mei ភេទស្រី អាយុ៥៧ឆ្នាំ មុខរបរទេសចរណ៍ ជនជាតិចិន។

តាមប្រភពព័ត៌មានពីលោកវរសេនីយ៍ត្រី សើន កែវសុវណ្ណធី មេបញ្ជាការរងកងរាជអាវុធហត្ថខណ្ឌពោធិ៍សែនជ័យបានអោយដឹងថា នៅមុនពេលកើតហេតុជនរងគ្រោះមកពីប្រទេសចិនធ្វើដំណើរតាមរយៈយន្តហោះអន្តរជាតិភ្នំពេញ ដើម្បីទេសចរណ៍នៅក្នុងប្រទេស ខណៈដែលជនរងគ្រោះចុះមកពីយន្តហោះធ្វើដំណើរតាមផ្លូវស្រាប់តែលេចមុខជនសង្ស័យ២នាក់ជិះម៉ូតូមួយគ្រឿងមកអែបធ្វើសកម្មភាពឆក់ទូរសព្ទដៃក៏ត្រូវជនរងគ្រោះទាញមកវិញបណ្ដាលអោយជនសង្ស័យដួលត្រូវប្រជាពលរដ្ឋស្វាគមន៍មួយដៃមួយជើងម្នាក់ ស្របពេលកម្លាំងកងរាជអាវុធហត្ថខណ្ឌពោធិ៍សែនជ័យកំពុងជិះម៉ូតូល្បាតនៅក្នុងមូលដ្ឋាន ដើម្បីការពារសុវត្ថិភាពកុំអោយមានបទល្មើសកើតឡើងក៏ឃាត់ជនសង្ស័យបានម្នាក់ រីឯម្នាក់ទៀតរត់គេចខ្លួនបាត់ស្រមោល។

បច្ចុប្បន្ននេះកងរាជអាវុធហត្ថខណ្ឌកំពុងកសាងឯកសារបញ្ជូនទៅកាន់ទីបញ្ជាការកងរាជអាវុធហត្ថក្រុងដើម្បីចាត់ការបន្ដតាមនីតិវិធីច្បាប់៕